Рубио Украинадаги урушни тугатиш режасининг дастлабки босқичларини айтди

Вашингтон Украинада ҳеч бўлмаганда қисқа муддатли ўт очишни тўхтатишни талаб қилмоқда, чунки ҳарбий ҳаракатлар давом этиши музокаралар жараёнига ҳисса қўшмайди. Бу ҳақда АҚШ Давлат департаменти раҳбари Марко Рубио кеча, 16 март куни эълон қилинган Американинг CBS телеканалига берган интервьюсида маълум қилди.

АҚШнинг жорий ташқи сиёсати ҳақида суҳбат чоғида телебошловчи Маргарет Бреннан Дональд Трампнинг махсус элчиси Стивен Уиткоффнинг яқинда Москвага сафари ва у ерда Владимир Путин билан учрашгани ҳақида сўради. Бошловчининг таъкидлашича, Рубио аввалроқ Уиткоффнинг Россияга ташрифи натижалари Москва ўт очишни тўхтатишга интилаётганини ёки Россия Президенти кечиктириш тактикасини афзал кўраётганини кўрсатишини айтган эди. Бироқ Путин тинчлик музокаралари йўлида аниқ қадам ташламади, кейинроқ Рубио Россия Ташқи ишлар вазири Сергей Лавров билан музокаралар ўтказди ва бу музокаралар натижасида ҳам ҳеч қандай баёнот берилмади. Шу фонда Бреннан Рубиодан Москва музокаралар жараёнини кечиктиришни танладими, деб сўради. Бунга жавобан АҚШ Давлат котиби Россия билан музокара жараёнини муҳокама қилмаслигига ишора қилди.

Унинг сўзларига кўра, Уиткоффнинг Путин билан учрашуви “ишончли”, бироқ “баъзи муаммолар бор”.

“Бу жуда узоқ муддатли ҳарбий фронтда олиб борилаётган, жуда кўп асоратларга эга бўлган мураккаб, уч йиллик уруш. Ҳеч ким буни осон демаяпти, лекин мен ҳамма режа нима эканлигини тушунишини истайман. А режа – ўт очишни тўхтатиш, шунда биз Б режага, иккинчи босқичга ўтишимиз мумкин, яъни барчани музокаралар столига жалб қилишга”, деди Рубио.

Шу билан бирга, Давлат департаменти раҳбарининг сўзларига кўра, Москва ва Киев ўртасидаги музокаралар тўғридан тўғри бўлиши шарт эмас.

“Лекин ҳар ҳолда, биринчи босқичдан ўтмагунимизча иккинчи босқичга ҳам кира олмаймиз. Улар бир-бирига қарата ўқ узаётган пайтда урушни абадий тугатиш тўғрисида келишиб олиш қийин ва шунинг учун ҳам Президент Трамп ўт очишни тўхтатишни хоҳлайди”, деди дипломат.

Эслатиб ўтамиз, АҚШ Президентининг махсус вакили Стив Уиткофф 13 март куни Россия етакчиси Владимир Путиннинг беларуслик Александр Лукашенко билан музокаралари якунланишини саккиз соат кутгани, шундан сўнг, Путин билан учрашишга муваффақ бўлгани хабар қилинганди.