Рубио НАТОни чуқур ислоҳ қилишга чақирди

АҚШ Давлат котиби Марко Рубио Шимолий Атлантика шартномаси ташкилотига (НАТО) чуқур ислоҳотлар зарур, деган фикрни билдирди. Унинг АҚШ Конгресси Вакиллар палатасининг Ташқи ишлар қўмитасидаги эшитувлардаги нутқи NBC News телеканали томонидан жонли эфирда узатилди.

“Менинг фикримча, НАТОга чуқур ислоҳотлар зарур”, дейди Рубио.

Америка ташқи сиёсат маҳкамаси раҳбаридан НАТОда ҳозирнинг ўзида шу каби ўзгаришлар кетаётгани ҳақида сўрашганда, у буни инкор этди.

У АҚШнинг НАТО бўйича европалик иттифоқчиларига тегишли ҳарбий базалардан фойдаланиш имконияти масаласи “Туркиядаги учрашувда” – альянснинг 7–8 июль кунлари Анқарада бўлиб ўтадиган саммитида “муҳим ўрин эгаллашини” билдирган. 

Қайд этилишича, Вашингтон Америка-Исроилнинг Эрон билан уруши пайтида АҚШ қуролли кучларининг ўз базаларига киришини чеклаб қўйган бир қатор Европа НАТО аъзоларининг ҳаракатларини кескин танқид қилган.

Бундан ташқари, Рубио НАТО Бош котиби Марк Рютте билан учрашуви чоғида ташкилотни ҳарбий ишлаб чиқаришни кенгайтиришга чақирган. Унинг сўзларига кўра, Вашингтон ҳарбий блокдан мудофаа-саноат базасини кенгайтиришни ва харажатлар бўйича мажбуриятларни ҳақиқий жанговар имкониятларга айлантиришни кутмоқда. Давлат котибининг айтишича, НАТОнинг кучи Европа давлатларининг кучига боғлиқ.

Эслатиб ўтамиз, аввалроқ НАТОнинг собиқ бош котиби Андерс Фог Расмуссен АҚШ иштирокисиз демократик давлатларнинг янги бирлашмасини тузишга чақирган эди.