Россияпараст Бабиш Чехияга Бош вазир бўлди

Чехия Президенти Пётр Павел жорий йилнинг октябрь ойида бўлиб ўтган парламент сайловларида ғалаба қозонган “Норози фуқароларнинг ҳаракатлари”нинг етакчиси Андрей Бабишни янги Бош вазир этиб тайинлади. Бу ҳақда “Euronews” хабар берди.

71 ёшли сиёсатчи 16 аъзодан иборат уч партияли коалицион ҳукуматни бошқаради. Вазирликка номзодлар таклиф қилинган ва Чехия Президенти уларни келаси ҳафта бошида тайинлаши кутилмоқда. Хабар қилинишича, парламент қуйи палатаси 13 январь куни ҳукумат дастурига овоз бериши мумкин.

Андрей Бабиш 2017 йилдан 2021 йилгача бош вазир лавозимида ишлаган. Сўнгги йилларда у мухолифатда эди. Ноябрь ойида у “Норози фуқароларнинг ҳаракатлари” (ANO) ҳаракати популистик “Ўзлари учун автомашиначилар” партияси ҳамда НАТО ва Европа Иттифоқини танқид қилувчи “Озодлик ва тўғридан тўғри демократия” партияси билан коалиция шартномаси тузган эди. Уч сиёсий куч вакиллари биргаликда Депутатлар палатасидаги 200 ўриндан 108 тасини эгаллайди.

Россияпараст Бабишнинг экстремал евроскептик партиялар томонидан қўллаб-қувватланган қайтиши Украинанинг Россиянинг кенг кўламли босқинидан ҳимоясини қўллаб-қувватлашни заифлаштириши мумкин. Ғалабасидан олдин Бабиш Чехиянинг Украинага миллиондан ортиқ артиллерия ўқларини етказиб бериш ташаббуси “чириган сиёсат” эканини эълон қилиб, бу солиқ тўловчилар учун жуда қиммат экани ва агар у ҳокимиятга қайтса, бекор қилинишини таъкидлаганди.

Эслатиб ўтамиз, аввалроқ Чехия Президенти Пётр Павел Ғарбнинг ҳозирги хатти-ҳаракатларини Иккинчи жаҳон уруши арафасидаги тинчлантириш сиёсатига қиёслаганди. Унинг айтишича, Путиннинг ғалабаси Ғарбга таҳдид солмоқда.