Россиянинг Украина билан урушда ютқазишини айтган бош иқтисодчи ишдан бўшатилди

Россиянинг давлат ривожланиш корпорацияси (VEB.RF) бош иқтисодчиси Андрей Клепач оммавий ахборот воситаларида унинг Россия иқтисодий “ҳолдан тойдириш уруши”да ғалаба қозона олмаслиги ҳақидаги фикрлари тарқалганидан кейин лавозимидан озод қилинди. Бу ҳақда “The Bell” хабар берди.

Нашр маълумотларига кўра, Клепачнинг ишдан бўшатилганини икки нафар иқтисодчи тасдиқлаган. Манбалардан бири VEB.RF раҳбари Игорь Шувалов иқтисодчини “юқоридан бўлган қўнғироқ”дан сўнг ишдан бўшатганини айтган. Яна бир манба эса бу қарор Клепачнинг 2026 йил май ойидаги чиқиши билан боғлиқлигини билдирган.

“The Bell” нашри VEB.RF матбуот хизматига сўров юборган, бироқ мақола эълон қилинган пайтга қадар расмий изоҳ олинмаган.

Гап Москва биржасининг Никитский клуби томонидан май ойи охирида ташкил этилган тадбирдаги чиқиш ҳақида кетмоқда. Ўшанда Клепач Украина иқтисодиёти уруш шароитларига қарамай фаолиятини давом эттираётганини таъкидлаган.

“Шунинг учун биз, бу “ҳолдан тўйдириш уруши”даги рақобатда ғалаба қозона олмаймиз. Бизда Украинада ҳаммаси қулаб тушади деган хаёл бор. Қулаб тушгани йўқ ва қуламайди ҳам. Бизнинг харажатларимиз эса ортиб бормоқда”, деган эди у.

Шунингдек, Клепач Россия технологик ва иқтисодий рақобатда дунёнинг етакчи давлатларидан ортда қолаётганини айтган.

“Биз технологик, иқтисодий рақобатда ҳам ютқазяпмиз. Нафақат Хитой ва АҚШга, балки айрим жиҳатларда Украинага ҳам”, деган у.

Эслатиб ўтамиз, аввалроқ Россия Президенти Владимир Путинни ҳибсга олиш ордерини берган Халқаро жиноий суд (ХЖС) бош прокурори Карим Хон жинсий зўравонлик ва тегажоғлик ҳақидаги айбловлар сабабли лавозимидан вақтинча четлатилган эди.