Россияда қурилишда ишлаётган ўзбекистонлик ҳалок бўлди

Жорий йилнинг 16 сентябрь куни Россиянинг Санкт-Петербург шаҳрида 23 ёшли ўзбекистонлик ишчи қурилиш майдонида ҳалок бўлди. Бу ҳақда Россиянинг Шимоли-ғарбий минтақалараро меҳнат инспекцияси матбуот хизмати хабар берди.

Қайд этилишича, Добролюбов проспектида, Россия Олий суди ва Олий суд ҳузуридаги суд департаменти биносини қуриш жараёнида 23 ёшли ўзбекистонлик ишчи қурилиш “леса”сида ишлаётганида 15 метр баландликдан қулаб тушиб, воқеа жойида вафот этган. Аниқланишича, ҳалок бўлган ишчи ва қурилиш компанияси ўртасида расмий меҳнат ҳужжатлари мавжуд бўлмаган.

Шимоли-ғарбий минтақалараро меҳнат инспекцияси раҳбари ўринбосари Ольга Казанскаянинг сўзларига кўра, ҳодисанинг эҳтимолий сабаблари ишчининг шахсий ҳимоя воситаларидан фойдаланмагани, жамоавий ҳимоя воситаларининг йўқлиги ва баландликда ишларни қониқарсиз ташкил этиш бўлган.

Эслатиб ўтамиз, аввалроқ Россиянинг Красноярск ўлкаси, Курагинский туманидаги конда 30 ёшли ўзбекистонлик эркак тоғ массаси босиб қолиши оқибатида ҳалок бўлган эди.