Россияда икки ўзбекистонлик ўз ватандошини “кийдириб кетди”

Россиянинг Санкт-Петербург шаҳрида икки ўзбекистонлик полициячилар ниқоби остида оддий курьер бўлиб ишлаган бошқа бир ўзбекистонликдан 100 минг рубль (15 млн сўмдан ортиқ) пулни товламачилик йўли билан алдаб олган. Бу ҳақда “78.ru” хабар берди.

Курьер полицияга мурожаат қилиб, товламачиликдан жабр кўрганини маълум қилган.

Унинг сўзларига кўра, жорий йилнинг 11 апрель куни кечқурун икки нотаниш киши унинг олдига келиб, ўзларини полиция ходимлари деб таништириб, гиёҳванд моддаларни сақлаганлик учун жиноий жавобгарликка тортиш билан таҳдид қила бошлаган. Ишончли бўлиши учун жиноятчилар тўппончани намойиш қилган ва йигит уларга пул беришга рози бўлган.

Билдирилишича, гумонланувчилар аллақачон қўлга олинган. Уларга нисбатан босқинчилик бўйича иш қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Россия Ички ишлар вазирининг биринчи ўринбосари Александр Горовой Санкт-Петербургда ўтказилган IX Меҳнат форумида Россияда 2024 йил якунига кўра, 6,3 миллион нафар чет эллик фуқаролар яшаётгани, улардан 1,4 миллион нафари ўзбекистонликлар эканини маълум қилганди.