Россияда атиги 1,5 фоиз мигрант болалар имтиҳондан ўта олди

Россияда 1762 нафар мигрант болалардан атиги 27 нафари рус тилини билиш бўйича имтиҳонни муваффақиятли топширди. Бу ҳақда Давлат думаси спикери Вячеслав Володин маълум қилди. 

Расмий маълумотларга кўра, мамлакатдаги мактабларда қабул компанияси жорий йилнинг апрель ойида бошланган. Тест синовлари бошланганидан бери 1762 нафар бола ҳужжат топширган. Улардан 335 нафари имтиҳонга қўйилган. Шундан 44 нафари тестда қатнашиб, бор-йўғи 27 нафари имтиҳондан муваффақиятли ўтган. Бу эса умумий ариза берувчиларнинг 1,5 фоизини ташкил этади.

Вячеслав Володин бу ҳолатни Россияда қабул қилинган янги қонунларнинг самараси сифатида баҳолаган. Унинг таъкидлашича, ҳозиргача миграцияни назорат қилиш мақсадида 15 та қонунчилик ташаббуси қабул қилинган ва уларнинг барчаси кучга кирган.

Хабар қилинишича, мигрантлар учун рус тилидаги тестлар, шу жумладан оғзаки қисм 1-синфдан 11-синфгача бўлган ҳар бир ўқув босқичи учун алоҳида ишлаб чиқилган. Мактабга кириш учун номзод 90 фоиз тўғри жавобларга эга бўлиши керак.

Қабул қилинган федерал қонунга кўра, мигрант болаларни Россия Федерацияси ҳудудида қонуний яшаётганлик ҳолати текширилмасдан, шунингдек, тест синови орқали тасдиқланган рус тилини етарли даражада билмасдан туриб умумий ўрта таълим муассасаларига қабул қилиш тақиқлангани айтиб ўтилган.

Эслатиб ўтамиз, ўтган йилнинг декабрь ойида Россия Президенти Владимир Путин рус тилини билмайдиган мигрант болаларнинг мактабларда ўқишини тақиқловчи қонунни имзолаганди. Ушбу лойиҳа чет эл фуқаролари фарзандларининг Россия таълим тизимида ўқиши, шу жумладан, тил диагностикаси ва мослаштириш дастурларини ўрганишига қаратилган. Мониторинг Россия Таълим вазирлиги ташаббуси билан ташкил этилган.