Россия Украинада йўловчи автобусини нишонга олди. Қурбонлар бор

Бугун, 16 сентябрь куни Россия ҳарбийлари Украинанинг Днепропетровск вилояти Никопол туманида йўловчи автобусига дрон орқали зарба берди. Бу ҳақда Днепропетровск вилоятининг ҳарбий маъмурияти раҳбари Александр Ганжи маълум қилди.

Билдирилишича, россияликлар автобусни зарба берувчи дрон билан нишонга олган. 5 киши воқеа жойида ҳалок бўлган, яраланган 7 кишига эса зарур тиббий ёрдам кўрсатилмоқда.

Маълумот учун, охирги вақтларда Россия ва Украина ўртасида фуқаролик объектлари, савдо-саноат инфратузилмаси ҳамда бошқа муҳим объектларга зарбалар кучайган. Хусусан, жорий ҳафта бошидан буён Украина ва Россия ўртасида бир қанча зарбалар амалга оширилди.

Жумладан, Россиянинг учувчисиз учиш аппаратлари Украина – Польша чегараси яқинидаги поездга зарба берганди. Ҳужум Буюк Британия ва Швециянинг собиқ бош вазирлари Борис Жонсон ва Карл Бильдт, шунингдек, Европа Иттифоқининг бир неча давлатларидан келган хавфсизлик бўйича маслаҳатчиларни олиб кетаётган дипломатик поезд станцияни тарк этганидан бир неча дақиқа ўтиб содир бўлган. Шунингдек, Украина Қуролли кучлари кеча, 15 сентябрга ўтар кечаси Таганрогга дронлар ва ракеталар билан ҳужум қилган.