Россия-Украина урушида яраланиб, Ўзбекистонга қочиб келган эркак қамалди

Украинадаги урушда Россия томонидан иштирокиб этиб, ярланган ва чегараларни ноқонуний кесиб ўтиб, Ўзбекистонга қочган 38 ёшли самарқандлик эркак 5 йил 6 ойга қамалди. QALAMPIR.UZ суд ҳужжати билан танишди.

Ҳужжатда келтирилишича, судланувчи Б.М. 2020 йилнинг ноябрь ойида ишлаш учун Россиянинг Москва шаҳрига борган. 2022 йилнинг май ойида эса гиёҳвандлик воситалари билан боғлиқ жиноят учун 10 йилга қамалган. Унинг судда кўрсатма беришича, 2021 йилнинг март ойида тожикистонлик таниши қўнғироқ қилиб, уни бир манзилга олиб боришни илтимос қилган. Эркак бунга рози бўлган ва улар йўлда кетаётганда полиция томонидан тўхтатилган. Шунда машинанинг орқа ўриндиғидан 109 грамм “героин” топилган. Шу сабабли Б.М. 10 йилга озодликдан маҳрум этилган.

Судланувчининг айтишича, колонияда унга Украиндаги урушда қатнашиш бўйича босим ўтказилиб, қийноққа солинган. Оқибатда у 2024 йилнинг сентябрь ойида Россия армияси билан шартнома имзолаган. Шундан сўнг, у бошқалар билан бирга Ростов орқали Луганскнинг Шахта шаҳрига олиб борилган. У ердаги ҳарбий қисмда 14 кунлик машғулотлар ўтказилган ва жанг бўлаётган ҳудудга олиб кетилган. Бироқ Б.М. мина портлаши оқибатида яраланган. Эркак эвакуация қилиниб, Донецкдаги шифохонага олиб борилган. Б.М. 2024 йилнинг декабрида такси орқали у ердан қочган ва “Тамара” исмли аёл билан танишиб, бир муддат унинг уйида яшириниб юрган. 2025 йилнинг апрель ойига қадар ўша уйда яшаган Б.М. Ўзбекистонга қайтишни мақсад қилган ва қозоғистонлик “Дед” билан танишиб, 1 минг 800 доллар эвазига Россиядан Қозоғистонга, кейин эса Қозоғистондан Ўзбекистонга сим тўсиқлар орқали ноқонуний кесиб ўтган. Ўзбекистоннинг Жиззах вилоятида уни акаси кутиб олган ва Паркент туманидаги опасиникига жойлаштирган.

Шундан сўнг, унинг ўзи ҳам одамларни чегарадан ноқонуний ўтказиш билан боғлиқ ишга аралашиб қолган. Б.М. 2025 йилнинг декабрь ойида “мижоз”дан 2000 доллар олаётган вақтда ДХХ ходимлари томонидан қўлга олинган.

Жорий йилнинг 7 август куни Жиноят ишлари бўйича Жомбой туман судида мазкур ишлар кўриб чиқилган. Б.М. Жиноят кодексининг 154-моддаси (ёлланиш) 1-қисми, 25, 168-моддаси (фирибгарлик) 2-қисми “б” банди, 223-моддаси (қонунга хилоф равишда чет элга чиқиш ёки Ўзбекистон Республикасига кириш) 2-қисми “б” банди ва 25, 223-моддаси 2-қисми “б” ва “в” бандлари билан айбли деб топилган. Унга қисман қўшиш йўли билан узил-кесил 5 йил 6 ой муддатга озодликдан маҳрум қилиш жазоси тайинланган.

Эслатиб ўтамиз, аввалроқ Россия томонидан Украинадаги урушда қатнашган самарқандлик 25 ёшли йигитнинг озодлиги 5 йилга чекланганди.