Россия ўғирланган украиналик болаларни Шимолий Кореяга юборган – Киев

Жорий йилнинг 3 декабрь куни АҚШ Сенатида бўлиб ўтган тингловларда Украина Россия ҳукуматини ўғирланган украиналик болаларни Шимолий Кореядаги “қайта тарбиялаш лагерларига” олиб боришда айблади. Бу ҳақда Украина Ҳудудий инсон ҳуқуқлари марказининг юридик маслаҳатчиси ва Халқаро адлия бўйича эксперти Екатерина Рашевская маълум қилган.

“Олдин бундай марказлар Россия ва Беларусь ҳудудида жойлашган бўлса, ҳозир болаларни Шимолий Кореяга ҳам юборишмоқда”, деган Рашевская. 

Унинг айтишича, ҳозир Россияда 165 та лагерь мавжуд бўлиб, у ерда украиналик боларга идеологик таълим берилиб, рус қадриятлари сингдирилмоқда ва Россиянинг Украинага бостириб кириши оқланмоқда.

Рашевскаянинг фикрича, Россиянинг якуний мақсади – “украиналикларни бир-бирини ўлдиришга мажбурлаш”. Шунингдек, у Украинадан олиб кетилган болалар улғайгач, уларга Россия армиясидан чақириқлар юборилишини таъкидлаган. 

Тинглов давомида Рашевская Сенатга Донецк вилоятининг босиб олинган ҳудудидан 12 ёшли Михаил ва уруш бошланишидан олдин аннекция қилинган Қримдаги Симферополь шаҳрида яшаган 16 ёшли Лизанинг фотосуратларини тақдим этган. Болалар яқинда Шимолий Кореянинг жануби-шарқидагиm “Сондовон” лагеридан топилган. У ерда уларга “япон ҳарбийларини йўқ қилиш” ўргатилган ва 1968 йилда “Пуэбло” кемасидаги 9 америкалик аскарни ўлдирган кореялик ветеранлар билан таништирилган.

Рашевская, шунингдек, Россия эгаллаб олинган ҳудудлардан олиб кетилган болаларни уларнинг оилалари билан қайта бирлаштириш бўйича мажбуриятларини бажармаётганини таъкидлаган. Human Rights Watch халқаро мустақил ташкилоти ҳам Россия ҳукуматининг эгалланган ҳудудларда украин тилини йўқ қилишга уринишини ҳужжатлаштирган.

Қайд этиш жоиз, аввалроқ БМТ Бош Ассамблеяси Россияни “мажбурий кўчирган ёки депортация қилган” барча украиналик болаларни зудлик билан қайтаришга чақирган резолюцияни қабул қилганди. 

Мазкур резолюция Украина бўйича чақирилган Фавқулодда Махсус Сессияда 91 та овоз билан маъқуллаган, 12 та давлат қарши чиққан, Ўзбекистон дохил 57 та давлат эса бетараф қолган.