Россия Трампнинг таҳдидини “жиддий” деб баҳолади

Россия Президенти матбуот котиби Дмитрий Песков АҚШ Президенти Дональд Трампнинг Россиядан олиб кириладиган товарларга 100 фоизлик бож жорий қилиш ҳақидаги таҳдидини “жиддий” деб баҳолади. Бу ҳақда Кремль вакилига таяниб, “Коммерсантъ” хабар берди.

Песковнинг таъкидлашича, бу баёнотлар Кремль томонидан таҳлил қилинмоқда.

“Ҳозирча аниқ айтиш мумкин бўлган нарса шуки, бундай қарорлар хоҳ Вашингтонда, хоҳ НАТО давлатларида, хоҳ Брюсселда қабул қилинсин – Украина томонидан тинчликка эмас, балки урушни давом эттиришга даъват сифатида қабул қилинмоқда”, деган Песков. 

Шунингдек, у Россия Президенти Владимир Путин бу борада шахсан изоҳ бериши мумкинлиги, аммо ҳозирча унинг позициясини кутиш лозимлигини урғулаган. 

Эслатиб ўтамиз, АҚШ Президенти Дональд Трамп аввалроқ Оқ уйда журналистларга берган интервьюсида Европа давлатлари ҳисобидан Украинага қурол етказиб беришни бошлаши, жумладан, 17 та Patriot зенит-ракета мажмуаси юборилиши режалаштираётганини айтганди.

Шунингдек, BBC телеканалига берган интервьюсида Трамп Владимир Путиндан ҳафсаласи пир бўлгани, бироқ ҳали у билан суҳбат якунланмагани ва агар 50 кун ичида уруш тўхтатилмаса, Россия ҳамда унинг савдо шерикларига нисбатан 100 фоиз бож жорий этишини ваъда қилганди.