Россия Киевдаги кўприкка зарба берди (видео)

Бугун, 3 октябрь эрталаб Россия қўшинлари Киевдаги Шимолий кўприкка реактив дрон билан зарба берди. Бу ҳақда Украина пойтахти мэри Виталий Кличко маълум қилди. 

Унинг сўзларига кўра, ўтиш жойида йўл қопламаси ва троллейбусларнинг контакт тармоғи шикастланган. Киев шаҳар ҳарбий маъмурияти кўприк бўйлаб ҳаракатланиш ёпилганини маълум қилган. Бу сабабли бир қатор автобус ва троллейбус йўналишлари кечикишлар билан ҳаракатлана бошлаган.

Қайд этиш жоиз, 1 октябрдан бери Россия кучлари Жанубий кўприкка бир неча бор ҳужум қилган. Ҳужумлардан бири чоғида дрон иншоотнинг таянч қисми яқинига бориб урилган, ўша пайтда кўприкдан метро поезди ўтаётган бўлган. Йўловчилар ва машинист жароҳат олмаган. Илк зарбалардан сўнг Жанубий кўприк орқали метро ва ерусти транспорти ҳаракати конструкцияларни текшириш учун вақтинча тўхтатилган. Кейинги ҳужумлардан сўнг эълон қилинган маълумотларга кўра, таянч, тўсиқ, йўл қопламаси ва метрополитеннинг ҳимоя бетон тўсиғи шикастланган.

Кнча, 2 октябрь куни Кличко Жанубий кўприкка яна зарба текканини маълум қилган. Бир неча ҳужумдан сўнг иншоот транспорт ва метро ҳаракати учун ёпилган, бу эса Киев йўлларида жиддий тирбандликларни келтириб чиқарган.

Эслатиб ўтамиз, аввалроқ Россия кучлари Харьков шаҳрининг икки туманига бошқариладиган авиабомбалар билан зарба бергани ҳақида хабар қилинган эди. Ҳужум оқибатида 2 киши ҳалок бўлган, 33 киши, жумладан, 2 нафар бола яраланган.