Россия АҚШнинг “супер-пупер ракетаси” ҳақидаги маълумотларни ўғирлаган – Трамп

Россия Американинг "супер-пупер ракетаси" ҳақида маълумотлар олган. Бу ҳақда АҚШнинг собиқ президенти Дональд Трамп Нью-Хемпширдаги ўз тарафдорлари билан учрашувида айтиб ўтди.

"Биласизми, уларда ракета бор, супер-пупер-гиперсоник, мен буни супер-пупер деб атайман. Бу оддий ракетадан беш баравар тезроқ. Бизда эса бундан ҳам юқори тезликка эриша оладиган ракеталар бор”, деган Трамп.

Унинг сўзларига кўра, Россия бу ракета ҳақидаги маълумотни Барак Обама (АҚШнинг 44-Президенти – таҳр..)нинг маъмуриятидан ўғирлаган. 

Шунингдек, собиқ давлат раҳбари АҚШ Хитой, Эрон ва Россия ракеталари ҳужумларини қайтариш учун ўзининг “Темир гумбаз” ракетага қарши мудофаа тизимига муҳтожлигини таъкидлаган.

Қайд этиш керакки, Трамп 2020 йилнинг сентябрида ҳам худди шундай баёнот билан чиққан эди.

У Россия АҚШнинг собиқ президенти Барак Обама маъмуриятидан технология ҳақидаги маълумотларни ўғирлаганидан кейингина гипертовушли қуролларни яратишга муваффақ бўлганини иддао қилган.