Россия 1,4 мингга яқин мигрантни депортация қилди

Россия полицияси турли ҳуқуқбузарликлар содир этган ва мамлакатда ноқонуний яшаётган 1400 нафарга яқин чет эл фуқаросини депортация қилишга қарор қилди. Бу ҳақда Россия ИИВ Москвадаги Бош бошқармасининг матбуот хизмати хабар берди.

Маълумотларга кўра, жорий йилнинг бошидан бери Россияга турли жиноятлар, жумладан оғир жиноятлар содир этиб, қидирувда бўлган 242 нафар, жиддий касалликларга чалинган 430 нафар, Россияга сохта ҳужжатлар билан кириб келган 100 дан ортиқ мигрантлар борлиги аниқланган. Оқибатда, 1400 га яқин хорижлик фуқароларга нисбатан мамлакатдан чиқариб юбориш тўғрисида буйруқ чиқарилиб, ушбу тоифадаги 450 дан ортиқ чет эл фуқароси депортация қилинган.

Шунингдек, Россия ҳукумати ўтган давр мобайнида 32 нафар шахснинг Россия фуқаролигини бекор қилиш тўғрисида қарорлар қабул қилган.

“Фуқаролиги бекор қилинган шахсларнинг асосий қисми ўта оғир жиноятларни, жумладан одам ўғирлаш, вояга етмаганларга нисбатан жинсий зўравонлик қилиш, гиёҳвандлик воситалари ва психотроп моддаларнинг ноқонуний айланиши ва миллий хавфсизликка зарар етказиш каби жиноятларни содир этганликда айбланган”, дея қўшимча қилинади хабарда.

Бундан ташқари, йилнинг ўтган даврида чет элликларни ноқонуний легаллаштириш бўйича 2400 та ва ноқонуний миграцияни ташкил этиш бўйича 170 та жиноят ҳолатлари қайд этилиб, Россия қонунчилигидаги тегишли моддалар билан судга юборилган.

“Шунингдек, юксак маънавий-ахлоқий қадриятларга эга бўлган ва радикал неолиберал кун тартибини фаол олға сураётган мамлакатларни тарк этган 344 нафар чет эл фуқароси Россия фуқаролигини олишнинг соддалаштирилган тартибидан фойдаланган”, дея таъкидланган бошқарма хабарида.

Эслатиб ўтамиз, аввалроқ Москва шаҳрининг Наро-Фоминская кўчасидаги ҳостелда ўтказилган рейд чоғида 300 дан ортиқ мигрант қўлга олиниб, ҳуқуқни муҳофаза қилувчи органларга олиб борилган ва уларнинг Россияда қонуний яшаб, ишлаётгани текширилган эди.

Бунёд Келдибоев