Роналдуни кашф этган мураббий вафот этди

Кеча, 9 апрель куни Португалия терма жамоаси ва “Ал-Наср” ҳужумчиси Криштиану Роналдунинг футбол оммасига танилишига сабаб бўлган скаут ва мураббий Аурелио Перейра 77 ёшида вафот этди. Бу ҳақда “The Portugal News” нашри хабар берди. 

Манбага кўра, Аурелио оғир хасталик оқибатида ҳаётдан кўз юмган. Аурелионинг энг машҳур шогирдларидан бири Криштиану Роналду мураббийнинг оила аъзоларига ҳамдардлик билдирди.

“Футбол оламининг буюк тимсолларидан бири орамизни тарк этди, аммо унинг мероси абадий яшайди. У мен ва яна кўплаб футболчилар учун қилган барча эзгу ишларига доимо миннатдор бўлиб яшайман. Барчаси учун ташаккур, жаноб Аурелио”, дейди Роналду.

Маълумот ўрнида, агар Аурелио Роналдуни “Мадейра”дан “Спортинг”га таклиф қилмаганида, футбол оламининг энг ёрқин вакили бу даражага ета олмасди. Шунингдек, Аурелио Рикарду Куарежма, Нани, Луиш Фигу каби португалиялик футбол юлдузларини оммага танитган.