Роналду терма жамоадан четлатилди – ОАВ

Португалия футбол федерацияси беш карра “Олтин тўп” соҳиби Криштиану Роналду терма жамоа йиғинини тарк этгани учун уни миллий жамоа сафида ўйнашдан четлатишга қарор қилди. Бу ҳақда “Mirror” нашри хабар берди.

Португалия футбол федерацияси қоидаларига кўра, Криштиану Роналдуга нисбатан автоматик равишда дисквалификация чораси қўлланган. Энди интизомий кенгаш футболчининг жазо муддатини белгилайди. У бир ойдан олти ойгача давом этиши мумкин.

Агар дисквалификация бир ойдан ортиқ муддатга белгиланса, Роналду келаси ой Дания ва Уэльсга қарши Миллатлар лигаси учрашувларида иштирок эта олмаслиги мумкин.

Интизомий кенгаш қарор қабул қилишда футболчининг узр сўрагани каби ҳолатларни ҳам инобатга олади. ESPN нашрининг хабар беришича, Роналдуга нисбатан қисқароқ муддатли дисквалификация қўлланиши эҳтимоли юқори.

Аввалроқ, Роналду терма жамоа йиғинини муддатидан олдин тарк этган эди. Унинг таъкидлашича, бунга бош мураббий Жорже Жезуш унга берган ваъдаларини икки марта бажармагани сабаб бўлган.

Ҳужумчи Миллатлар лигасининг янги мавсумида Уэльсга қарши ўйинда (1:0) майдонга тушган, аммо Норвегияга қарши баҳсда (2:1) захирада қолдирилган. Роналдунинг айтишича, дастлаб у мазкур учрашувда ўйнаши режалаштирилмаган, бироқ мураббий ундан 30 дақиқа майдонда ҳаракат қилишга тайёр туришни сўраган. Бироқ якунда унга умуман ўйин амалиёти берилмаган.

Маълумот учун, 41 ёшли Роналду беш карра Чемпионлар лигаси ғолиби, Европа чемпиони ва Миллатлар лигасининг икки карра ғолиби ҳисобланади. У терма жамоалар, Европа чемпионатлари, Чемпионлар лигаси ва клублар ўртасидаги жаҳон чемпионати тарихидаги голлар бўйича қатор рекордларга эга.

Португалиялик футболчи 2022 йил декабридан буён Саудия Арабистонининг “Ал-Наср” клубида тўп сурмоқда. У фаолияти давомида 980 та гол урган. Уларнинг 834 таси клублар, 146 таси эса Португалия терма жамоаси сафида киритилган.