Роналду терма жамоа базасидан нега кетиб қолганини очиқлади

Португалия терма жамоаси бош мураббийи Жорже Жезус ҳужумчи Криштиану Роналдуга берган ваъдасини икки марта бажармаган ва шу сабабли футболчи терма жамоа базасини тарк этган. Бу ҳақда Роналду Instagram саҳифасида маълум қилди.

Аввалроқ, Роналду Миллатлар лигаси гуруҳ босқичининг учинчи тури олдидан Португалия терма жамоаси йиғинини тарк этгани маълум бўлган эди. Футболчи қарорининг сабабларини кейинроқ тушунтиришини айтган.

Роналду Норвегияга қарши 2:1 ҳисобида якунланган учрашувда захирада қолган эди. Кейинчалик у воқеа тафсилотларини очиқлаб, терма жамоа йиғинини тарк этишига Жорже Жезуснинг ҳаракатлари сабаб бўлганини билдирди.

“Лиссабондаги Уэльсга қарши ўйинда мени ҳеч қандай муаммосиз алмаштиришди ва сардорлик боғичини ўзим Бруну Фернандешга топширдим. Мен учун энг муҳими ғалаба қозониш эди. Норвегиядаги ўйин куни мураббий кутилмаганда мендан 30 дақиқа майдонда ўйнашга тайёр туришимни сўради. Ҳолбуки, тайёргарлик режамга кўра, мен ўша учрашувда майдонга тушмаслигим керак эди.
Бу илтимос жисмоний тикланиш ва машғулотлар режамда йўқ эди. Чунки мен йиғиннинг сўнгги ўйинидагина майдонга тушишни режалаштирган эдим. Шунга қарамай, рози бўлдим. У ўшанда 30 дақиқа ўйнашим кераклигини айтди. Танаффусдан кейин захира ўриндиғида дақиқалар ўтишини кутдим, аммо мени майдонга чақиришмади. Мураббий ўз сўзида турмади”, дейди Роналду.

Футболчининг айтишича, кейинчалик томонлар ўртасида суҳбат бўлиб ўтган ва Жезус матбуот анжуманида воқеанинг ҳақиқий сабабларини очиқ айтиши кераклиги ҳақида келишиб олинган.

“Биз матбуот анжуманида ҳақиқатни айтишга келишиб олдик: мен ўйнашни сўрамаганман, бу унинг қарори бўлган. У мени қизишга чиқариб, кейин майдонга туширмагани хато эканини тан олиши керак эди.
Келишув оддий эди – мураббий матбуот анжуманини шу мавзу билан бошлайди, масалани ёпиш ва ҳақиқатни айтишга ҳаракат қилади. Аммо матбуот анжуманида биз келишган гапларнинг ҳеч бири айтилмади. Мен шахсий суҳбатимизда айтилмаган ва, менимча, мен лойиқ бўлмаган сўзлар ҳамда оҳангни эшитдим”, дея қўшимча қилди португалиялик футболчи.

Роналду терма жамоа йиғинини тарк этиш қарори ҳақида ҳам гапирди.

“Кейинги ҳаракатларни кутмасдан йиғинни тарк этишга қарор қилдим. Мен учун муносабатларда энг муҳими – ҳақиқат. Қанчалик оғриқли бўлмасин, менга ҳақиқатни айтишларини хоҳлайман”, дейди Роналду.

Маълумот учун, 41 ёшли Криштиану Роналду беш карра Чемпионлар лигаси ғолиби, Европа чемпиони ва икки карра Миллатлар лигаси ғолиби ҳисобланади. У миллий терма жамоалар, Европа чемпионатлари, Чемпионлар лигаси ва Клублар ўртасидаги Жаҳон чемпионати тарихида энг кўп гол урган футболчилардан бири ҳисобланади. Роналду 2022 йил декабридан буён Саудия Арабистонининг “Ал-Наср” клубида ўйнаб келмоқда. У фаолияти давомида 979 та гол урган бўлиб, уларнинг 146 таси Португалия терма жамоаси, 833 таси эса клублар сафида киритилган.