Роналду “Форсаж” фильмида роль ўйнаши мумкин

Америкалик актёр ва продюсер Вин Дизель беш карра “Олтин тўп” соҳиби, португалиялик футболчи Криштиану Роналдуга “Форсаж” фильм франшизасида роль ёзилганини маълум  қилди. Бу ҳақда Дизель Instagram саҳифасида хабар берди.

Дизель 2024 йил февраль ойида ижтимоий тармоқларда франшизанинг 2027 йил апрель ойида премьераси режалаштирилган 11-қисми охирги бўлишини ишора қилган эди. У кеча, 12 декабрь куни  португалиялик футболчи билан тушган суратини Instagram саҳифасида жойлаштирди ва шундай ёзди:

“Ҳамма ундан “Форсаж” фильмида роль ўйнашини сўраган эди. Айтишим керакки, у ажойиб. Биз унга махсус роль ёзиб бердик”, дея изоҳ ёзган Дизель Instagram постида.

Маълумот учун, Роналду беш карра “Олтин тўп” соҳиби, беш карра Чемпионлар Лигаси ғолиби, Европа чемпиони ва расмий ўйинда жаҳон футболининг энг кўп гол урган футболчиси ҳисобланади. У 2023 йил январидан бери  Саудия Арабистонининг “Ал-Наср” жамоасида тўп сурмоқда. 

Эслатиб ўтамиз, аввалроқ Португалия терма жамоаси сардори Криштиану Роналду аралаш яккакурашлар бўйича WOW FC (The Way of Warriors FC) компаниясининг ҳаммуаллифига айланиб, ММА оламига қўшилган эди. Энди португалиялик футбол юлдузи кино оламида ҳам кўриниш бериши мумкин.