Роналду 50 ёшгача ўйнаши мумкин – Жоржина

Криштиану Роналдунинг бўлажак рафиқаси Жоржина Родригес 41 ёшли португалиялик ҳужумчининг фаолиятини давом эттириш истаги ҳақида фикр билдириб, Роналду 50 ёшгача ўйнаши мумкинлигини айтди. Бу ҳақда Жоржина ўзи ҳақида сувратга олинаётган ҳужжатли филмда сўз очди.

“Мен унга тез-тез: Криштиану, сенда ҳамма нарса бор, энди ҳаётдан бироз завқланайлик, дейман. У эса: Сен ҳамма нарсани яхши кўрасан, аммо футбол менинг энг катта иштиёқим бўлиб қолмоқда”, деб жавоб қайтаради. Биз танишган илк кунданоқ Криштиануда футболга бўлган иштиёқ ҳали ҳам сақланиб қолгани мени ҳайратга солади. У ҳар сафар майдонга чиққанида бор кучини ишга солади”, дейди Родригес.

Унинг сўзларига кўра, мухлислар Роналдунинг фаолияти қачон якунланиши ҳақида кўп сўрашади.

“У ҳатто 50 ёшигача ҳам футбол ўйнаши мумкин”, дейди Жоржина.

Маълумот учун, Роналду жорий йилнинг май ойида “Ал-Наср” сафида Саудия Арабистони чемпионлигини қўлга киритди. Шундан сўнг у Португалия терма жамоаси билан ўз фаолиятидаги олтинчи Жаҳон чемпионатида иштирок этмоқда. Ҳужумчи мундиалда ҳозирга қадар икки марта гол урди ва профессионал фаолиятидаги умумий голлари сонини 975 тага етказди.

Хабарларга кўра, жуфтлик 2026 йилги Жаҳон чемпионати финалидан сўнг Мадейрадаги Фуншал соборида никоҳ тўйини ўтказишни режалаштирмоқда.