Роберто Карлос юрак операциясини ўтказди

“Реал Мадрид” ва “Интер” клубларининг собиқ ҳимоячиси Роберто Карлос Бразилияда юрак операциясини ўтказди. Бу ҳақда “Agencia Nova” хабар берди.

Манбага кўра, 2025 йилнинг 31 декабрь куни шифокорлар текширув пайтида бразилиялик футболчининг оёғида қон қуйқасини аниқлаган. Бутун тананинг MRT текшируви унинг юраги яхши ишламаётганини кўрсатган. Шундан сўнг, Роберто Карлос жарроҳлик амалиёти учун шифохонага ётқизилган. Операция уч соат давом этган.

Маълумотларга кўра, собиқ футболчи операциядан сўнг уйига қайтган ва бир неча кундан кейин текширув учун клиникага қайтади. 52 ёшли Карлос ижтимоий тармоқларда операцияни амалга оширган шифокорлар билан тушган суратини ҳам жойлаштириб, “Барча тиббиёт ходимларига эътибор ва ғамхўрликлари учун миннатдорчилик билдираман”, дея изоҳ қолдирган.

Маълумот учун, Роберто Карлос 1996-2007 йиллар давомида “Реал Мадрид” сафида тўп сурган. Мадрид клуби билан у тўрт марта Испания чемпиони бўлган ҳамда уч марта Чемпионлар лигаси кубогини қўлга киритган. Шунингдек, Роберто Карлос Бразилия терма жамоаси таркибида 2002 йилги Жаҳон чемпионатида ғалаба қозонган.