“Реал” юлдузлари 12 та ўйинга дисквалификация қилиниши мумкин

“Реал Мадрид” ярим ҳимоячиси Жуд Беллингем ва ҳимоячиси Антонио Рюдигер Испания чемпионатининг 12-турида “Валенсия”га қарши учрашувда юз берган воқеа сабабли жиддий интизомий жазога тортилиши мумкин. Бу ҳақда “The Touchline” нашри хабар берди.

Нашр маълумотларига кўра, можаро “Реал Мадрид” ва “Валенсия” ўртасидаги учрашувнинг биринчи бўлимидан кейин юз берган. Стадион туннелида икки жамоа вакиллари ўртасида жанжал келиб чиққан. Ҳодиса вақтида “Реал Мадрид”нинг икки футболчиси жисмоний куч ишлатган бўлиши мумкин.

Хабарларга кўра, англиялик ярим ҳимоячи Жуд Беллингем хавфсизлик ходимларидан бирини урган. Германиялик ҳимоячи Антонио Рюдигер эса можарони бартараф этишга уринган бошқа бир стадион ходимига тарсаки туширганликда гумон қилинмоқда.

Ҳодисанинг барча тафсилотлари ҳозирча номаълум. Футболчилар ёки интизомий органлар томонидан ушбу маълумотлар расман тасдиқланмаган. Маҳаллий ОАВ хабарларига кўра, “Валенсия” клубида туннелда содир бўлган воқеанинг видеотасвирлари бўлиши мумкин.

Агар жисмоний куч ишлатилгани ҳақидаги даъволар тасдиқланса ва интизомий органлар қоидабузарликларни аниқласа, футболчилар 4 тадан 12 тагача ўйинга дисквалификация қилиниши мумкин. Бироқ бу ҳозирча расмий қарор эмас.

Агар Беллингем ва Рюдигер узоқ муддатга дисквалификация қилинса, Мадрид клуби икки асосий футболчисидан маълум муддатга айрилиши мумкин.

Эслатиб ўтамиз, Испания чемпионатининг 12-туридан ўрин олган “Валенсия” ва “Реал Мадрид” учрашуви 3:0 ҳисобида мадридликлар фойдасига якунланган эди.