“Реал” оғирлиги 40 кг бўлган кубокни ютди

Кеча, 12 август куни “Реал Мадрид” жамоаси “Депортиво Ла-Корунья”ни 1:0 ҳисобида мағлуб этиб, оғирлиги 40 килограмм бўлган Тереcа Эррера кубогини қўлга киритди.

Учрашув Испаниянинг Ла-Корунья шаҳридаги “Риасор” стадионида бўлиб ўтди. Марокашлик ярим ҳимоячи Браим Диас ягона голни бўлимнинг қўшиб берилган вақтида – 45+1-дақиқада урди.

“Депортиво” турнир тарихидаги энг кўп совринни қўлга киритган клуб ҳисобланади – жамоа 26 марта ғолиб чиққан. “Реал Мадрид” эса 10 та соврин билан иккинчи ўринда.

“Реал” бош мураббийи Жозе Моуриньо учун бу соврин клубга қайтганидан кейинги илк титул бўлди. Моуриньо 11 июнь куни жамоани бошқаришга киришди ва шу йилнинг январь ойида жамоа бош мураббийи бўлган Альваро Арбелоа ўрнини эгаллади.

Моуриньо бунга қадар ҳам “Реал Мадрид”ни 2010-2013 йилларда бошқарган. Унинг раҳбарлигида клуб 2011-2012 йилги Испания чемпионати, 2010-2011 йилги Испания кубоги ва 2011-2012 йилги Испания Суперкубогида ғолиб чиққан.

Ўтган мавсумда Испания чемпионати якунига кўра, “Реал Мадрид” 86 очко тўплаб, 94 очко жамғарган “Барселона”дан кейин иккинчи ўринни эгаллаган. “Депортиво” эса Сегунда дивизионида 77 очко тўплаб, 2026-2027 йилги мавсумда Ла Лигада иштирок этиш ҳуқуқини қўлга киритган.