“Реал” кучли саккизлик учун етарлича барқарор эмас –Мбаппе

Мадриднинг “Реал” клуби ҳужумчиси Килиан Мбаппе Чемпионлар лигаси плей-офф босқичига тушиб қолган жамоаси кучли саккизликдан жой олиш учун етарлича барқарор эмаслигини тан олди. Бу ҳақда франциялик ҳужумчи “Бенфика” билан ўйиндан кейин журналистларга маълум қилди.

Кеча, 28 январь куни Европа Чемпионлар лигаси 15 кара ғолиби ҳисобланган “Реал” Жозе Моуриньо бошчилигидаги “Бенфика”га қарши баҳсда 2:4 ҳисобида мағлуб бўлди. Натижада мадридликлар лига босқичи умумий жадвалида 9-ўринни эгаллади ва 1/8 финалга тўғридан тўғри йўлланма олиш ўрнига, февраль ойида “Бенфика” ёки “Будё-Глимт” жамоаларидан бирига қарши плей-офф баҳсида майдонга тушадиган бўлди.

“Муаммо шундаки, биз ўйинимизда изчил эмасмиз. Буни тузатишимиз керак. “Реал” кучли саккизлик учун етарлича барқарор эмас эди. Бир куни яхши, бошқа куни ёмон ўйнаш чемпион жамоага ярашмайди”, дейди Мбаппе учрашувдан сўнг журналистларга.

Шунингдек, у плей-офф баҳсларида иштирок этишга мажбур бўлиш жамоа учун оғир эканини таъкидлади:

“Бугун биз айнан шундай вазиятга тушишга лойиқ эдик. “Бенфика” яхшироқ эди. Энди яна икки плей-офф ўйинини ўтказишимиз керак. Бу оғриқли, чунки биз февраль ойида ўз устимизда хотиржам ишлашни хоҳлагандик”, дея қўшимча қилди Мбаппе.

Франциялик ҳужумчи Лиссабондаги ўйинда нега жамоа кутилганидек ҳаракат қила олмаганини аниқ сабаб билан изоҳлаш қийинлигини ҳам билдирди.

Маълумот учун, UEFA Чемпионлар лигаси гуруҳ босқичи якунлангандан сўнг  “Арсенал”, “Бавария”, “Ливерпуль”, “Тоттенхем”, “Барселона”, “Челси”, “Спортинг”, “Манчестер Сити” 8 та жамоа нимчорак финалга тўғридан тўғри йўл олди.