“Реал” футболчисини терма жамоасига беришни истамаяпти

Аргентина терма жамоаси ва Испаниянинг “Реал Мадрид” клуби  футболчиси Франко Мастантуоно шу йилнинг сентябрь ойида бўлиб ўтадиган U-20 Жаҳон чемпионатида иштирок этиш истагини билдирган. “Реал Мадрид” эса ўз футболчисини кичик мундиалга қўйиб юбориш истагида эмас. Бу ҳақда “El Chiringuito” хабар берди.

Мастантуоно учун ушбу кичик мундиал ўз юртини жаҳон миқёсида намойиш этиш имконияти бўлгани учун футболчида катта қизиқиш уйғотмоқда, бироқ U-20 Жаҳон чемпионати FIFA кунларидан ташқарида бўлгани сабабли бу “Реал Мадрид” учун жиддий муаммолар келиб чиқариши мумкин.

2025 йилги U-20 Жаҳон чемпионати 27 сентябрдан 19 октябргача Чилида бўлиб ўтади. Аргентина терма жамоаси Италия, Австралия ва Куба билан биргаликда “D” гуруҳидан жой олган. Уларнинг илк учрашуви 28 сентябрь куни Кубага қарши бўлиб ўтади, сўнгра 1 октябрда Австралия ва 4 октябрда Италия билан тўқнаш келади.

Агар Аргентина финалгача етиб борса, Мастантуоно “Реал Мадрид” сафида 7 та муҳим ўйинни ўтказиб юбориши мумкин. Улар орасида “Атлетико Мадрид”га қарши дерби, Чемпионлар лигасидаги “Қайрат” билан баҳс ва Ла Лиганинг “Вильярреал”га қарши учрашуви бор. Шунингдек, турнир олди тайёргарлик даврида ҳам у “Марсел”га қарши Чемпионлар лигаси учрашуви ҳамда “Эспаньол” билан Лига ўйинида майдонга туша олмаслиги мумкин.

Турнир плей-офф босқичи 7 октябрдан бошланади. Демак, агар Аргентина юқори босқичларга чиқса, Мастантуоно камида октябрь ўрталаригача “Реал” сафида кўринмаслиги эҳтимолдан холи эмас.

Шу билан бирга, футболчининг халқаро мусобақада иштироки бўйича сўнгги қарорни “Реал Мадрид”нинг ўзи қабул қилади. Мастантуоно жамоанинг жорий мавсумдаги муҳим лойиҳасида асосий фигурага айлангани боис, клуб уни халқаро турнирга қўйиб юбормасликка ҳам қарор қилиши мумкин.

Эслатиб ўтамиз, жорий йил февраль ойида Фарҳод Нишонов қўл остидаги Ўзбекистон U-20 терма жамоаси Хитойда бўлиб ўтаган Осиё кубоги чорак финал баҳсида Жанубий Кореяга пенальтилар сериясида мағлуб бўлиб, жаҳон чемпионати йўлланмасидан мосуво бўлган эди.