Расман! Сенегалнинг чемпионлиги Марокашга берилди

Африка футбол конфедерацияси (CAF) апелляция кенгаши Африка кубоги регламентининг 84-моддасига мувофиқ қарор чиқариб, Сенегал терма жамоасини Марокашга қарши ўйинда 0:3 ҳисобида мағлуб деб топди ва Сенегалнинг чемпионлиги Марокашга берилди. Бу ҳақда CAF хабар берди.

Манбага кўра, ушбу қарор Марокаш футбол федерацияси томонидан берилган апелляция асосида қабул қилинган. Шунингдек, апелляция кенгаши аввалги CAF интизомий кенгаши қарорини бекор қилиб, Сенегал жамоаси ҳаракатлари регламентнинг 82 ва 84-моддаларига зид экани аниқланган. Сенегал футбол федерацияси регламентнинг 82-моддасини бузган деб топилди. Натижада, Сенегал терма жамоасининг Африка кубоги финалидаги учрашувига техник мағлубият ёзилди ва ўйин 0:3 ҳисобида Марокаш фойдасига ҳал этилди.

Бунга сабаб сифатида Сенегал терма жамоасининг футболчилари Африка кубоги финал учрашувида ҳакамнинг қароридан норози бўлиб майдонни тарк этгани билан изоҳланган. Регламентга кўра, ушбу ҳолатда жамоага техник мағлубият ёзилиши керак бўлган. 

Шунингдек, алоҳида интизомий ҳолатлар бўйича ҳам қарорлар эълон қилинди:

Исмоил Саибари бўйича апелляция қисман қаноатлантирилди. Унинг интизомий қоидаларни бузганлиги ҳақидаги қарор ўз кучида қолдирилди. Футболчига нисбатан жазо 2 та расмий ўйинга дисквалификацияга ўзгартирилди (шундан 1 таси шартли). Унга қўйилган 100 минг АҚШ доллари миқдоридаги жарима бекор қилинди.

Бундан ташқари, бошқа эпизодлар юзасидан ҳам қуйидаги қарорлар қабул қилинди:

Тўп олиб берувчи болалар билан боғлиқ воқеа учун жавобгарлик Марокаш федерацияси зиммасига юклатилди ва жарима 50 минг долларгача камайтирилди.

Лазер ҳодисаси бўйича жарима 10 минг долларгача камайтирилди.

CAF Апелляция кенгаши баёнотига кўра, бошқа барча талаб ва мурожаатлар рад этилган.

Маълумот учун, жорий йилнинг 18 январь куни бўлиб ўтган Африка кубоги финал учрашувининг қўшимча бўлимларнинг  94-дақиқасида Папе Гуэйенинг голи эвазига Сенегал ўз тарихида иккинчи бор чемпионликни қўлга киритган эди.