Путиннинг Украинадан ташқарида ҳам амбициялари бўлиши мумкин – Трамп

АҚШ Президенти Дональд Трамп Россия Президенти Владимир Путиннинг ҳудудий амбициялари Украинадан ташқарига ҳам тарқалиши мумкинлигини истисно этмаяпти. Бу ҳақда у кеча, 25 июнь куни Гаагада бўлиб ўтган матбуот анжуманида сўз очди.

“Менимча, бу мумкин”, деди у журналистларнинг саволига жавобан.

Шу билан бирга, Трамп Путин “музокаралар олиб боришини” ва Украинага қарши урушдан чиқишни исташига ишонч билдирди, чунки “у учун бу бутунлай чалкашлик”.

Оқ уй раҳбарининг сўзларига кўра, яқинда Путин унга қўнғироқ қилиб, Эрон масаласида ёрдам таклиф қилган, бироқ у Путинга Россия билан “ёрдам бергани” маъқулроқ эканини айтган. 

“Менимча, у шунчаки саросимага тушган одам. Мен жуда ҳайронман. Ҳаммасини осонликча ҳал қиламиз деб ўйладим”, деб таъкидлади Америка раҳбари.

Нега президентликка қайтганидан кейин беш ой ўтиб, сайловолди чоғида Украинадаги урушни тугатиш ҳақидаги ваъдасини бажармагани ҳақидаги саволга Трамп Путин “жуда оғир одам” ва Украина Президенти Владимир Зеленский билан “муаммолар борлигини” айтди.

У яна Путинга қўнғироқ қилмоқчи эканини қўшимча қилди, бироқ қачонлигини айтмади.

25 июнь куни Трамп Гаагадаги НАТО саммитидан кейин Зеленский билан учрашди. Унинг сўзларига кўра, у билан Россия ва Украина ўртасида ўт очишни тўхтатиш масаласини муҳокама қилмаган, шунчаки “унинг аҳволини” билиб олган.

“Учрашувдан шуни англадимки, Зеленский бунинг тугашини хоҳлайди. Мен Путин билан гаплашишим керак, келинг, буни якунлай оламизми? Ўтган ҳафтада қарийб етти минг Украина ва Россия аскари ҳалок бўлган”, деди Трамп.

Ўз навбатида, Зеленский АҚШ Президенти билан Украина шаҳарларини ҳимоя қилиш учун Американинг Patriot ҳаво мудофаа тизимларини сотиб олиш ва дронларни биргаликда ишлаб чиқариш имкониятларини муҳокама қилганини айтди. Шунингдек, у Трампга Россия делегацияси билан Истанбулда олиб борилган музокаралар, асирлар ва ўликларни алмашиш ҳақида гапириб берди.

“Биз жанг майдонидаги вазият ҳақида гаплашдик. Путин аниқ ғалаба қозонмаяпти. Президентга ҳақиқатда жойларда содир бўлаётган воқеаларни фактлар билан таништирдим”, дея хулоса қилди Зеленский.

Ғарб ҳарбийлари ва сиёсатчилари мунтазам равишда Путин НАТОга ҳужум тайёрлаётган бўлиши мумкинлигини айтишади. Уларнинг прогнозларига кўра, бу 3-5 йил ичида содир бўлиши мумкин ва мақсад Болтиқбўйи мамлакатлари – Латвия, Литва ёки Эстония бўлади.

Путин аллақачон ҳарбий харажатларни ялпи ички маҳсулотнинг 7 фоизигача оширган ва ҳозирда харажатлар давлат бюджетининг учдан биридан кўпроғини ташкил қилади.

Шу билан бирга, Финляндия ва Болтиқбўйи мамлакатлари билан чегарадош Ленинград ҳарбий округида ҳарбий базалар, қурол-яроғ ва техника омборлари, шунингдек, ўн минглаб ҳарбий хизматчиларни бошқариш учун армия штаб-квартираси қурилмоқда.