Путин ва Трамп учрашувига қайтадан тайёргарлик кўрилади – Лавров

Москва Вашингтон билан Россия ва АҚШ Президентлари Владимир Путин ва Дональд Трамп ўртасидаги саммитга тайёргарликни қайта бошлаш масаласини муҳокама қилишга тайёр. Бу ҳақда Россия Ташқи ишлар вазири Сергей Лавров маҳаллий матбуотга берган интервьюсида сўз очди.

Лавровнинг айтишича, Будапешт учрашув ўтказиш учун Россияга энг мақбул жой ҳисобланади. 

“Агар америкалик ҳамкорлар ўз таклифларини янгилаб, саммитни тайёрлашга киришса, биз Будапештни энг қулай вариант сифатида кўриб чиқамиз”, деган вазир. 

Лавров, шунингдек, АҚШ Президенти Дональд Трамп ҳам Венгрия Бош вазири Виктор Орбан билан учрашувида Будапештни афзал кўрганини қўшимча қилган. У АҚШнинг Россия билан учрашувни бекор қилгани ҳақидаги хабарларни рад этган. Лавровнинг айтишича, бу қарор Россия томонидан юборилган “Украина бўйича меморандум” билан боғлиқ эмас.

Вазирнинг тушунтиришича, “нон-папер” шаклидаги бу ҳужжат (мажбурий кучга эга бўлмаган ишчи таклиф) Путин ва Трампнинг 16 октябрь куни бўлиб ўтган телефон суҳбатидан бир неча кун аввал АҚШ томонига юборилган. Унга кўра, меморандумда Анкориждаги аввалги музокараларда эришилган ўзаро тушунишлар эслатиб ўтилган, ҳеч қандай провокацион мазмун бўлмаган.

“Президент Трамп телефон суҳбатида ҳеч қандай норозилик билдирмаган. У биз юборган ҳужжатни провокация сифатида тилга ҳам олмади”, деган вазир. 

Лавровнинг сўзларига кўра, суҳбатдан уч кун ўтиб, АҚШ Давлат котиби Марко Рубио билан телефон орқали мулоқот бўлган. Унинг айтишича, кейинги босқичда иккала мамлакатнинг ташқи сиёсат, мудофаа ва махсус хизмат вакиллари учрашуви режалаштирилган эди, аммо бу ташаббус АҚШ томонидан давом эттирилмаган.

“Биз америкаликлардан аниқ жой ва вақт бўйича ташаббус кутгандик, чунки саммитни ўтказиш таклифи улардан чиққан эди. Бироқ бунинг ўрнига улар “учрашувнинг фойдаси йўқ” деган баёнот билан чиқди”, дея қўшимча қилган Россия ТИВ раҳбари. 

Қайд этиш жоиз, 16 октябрь куни Путин ва Трамп телефон орқали суҳбатлашгач, Трамп Будапештда юзма-юз учрашув ўтказиш таклифини билдирган, аммо орадан бир неча кун ўтиб, саммит бекор қилинганини эълон қилган.