Путин Украинада “дадилроқ ҳаракат қилиш” таклифига жавоб берди

Россия Президенти Владимир Путин Украинадаги урушда “янада дадилроқ ҳаракат қилиш” таклифига муносабат билдириб, бундай қарорлар Россия томони учун жанг майдонида йўқотишларга олиб келиши мумкинлигини айтди. Бу ҳақда у бугун, 27 июль куни Кремль саройида Давлат Думасининг VIII чақириқ депутатлари билан учрашувда сўз очди.

“Биз ғалаба қиламиз. Лекин дадилроқ ҳаракат қилиш керак”, деган тақдирлаш маросими вақтида мукофот олувчилардан бири Путинга.

Бунга жавобан Путин бундай ёндашувнинг ўзига хос хавфлари борлигини таъкидлаган.

“Аммо савол туғилади: янада дадилроқми? Худди иқтисодиётдаги каби бу ерда ҳам ўзига хос хавфлар бор. Уларнинг баҳоси эса биз томондаги жанг майдонидаги йўқотишлардир. Шу боис биз эҳтиёткорлик билан, аммо қатъий ва изчил равишда мамлакат олдига қўйилган мақсадларга эришамиз”, деган Путин.

У Россия бундан буён ҳам ҳарбий операцияда белгиланган мақсадларга эришиш йўлида эҳтиёткор, аммо изчил ҳаракат қилишини таъкидлаган.

Шунингдек, 2025 йил 19 декабрь куни Россия Президенти Украина масаласида АҚШ ташаббуси билан таклиф этилган айрим муросаларга рози бўлганини, бироқ бу Москва учун “осон бўлмаган қарорлар” бўлганини қайд этган.

Эслатиб ўтамиз, аввалроқ Кремль матбуот котиби Дмитрий Песков АҚШ ва Украина ўртасида муҳокама қилинаётган ҳаво сулҳи таклифига муносабат билдириб, бу ҳақда гапиришга ҳали эрта эканини айтганди. Унга кўра, Москва янги ташаббусларни фақат Россия манфаатларига мос келсагина кўриб чиқади.