Путин Трамп ва Си Цзиньпин билан учрашув ўтказишни таклиф қилди

Россия Президенти Владимир Путин АҚШ раҳбари Дональд Трамп ва Хитой Раиси Си Цзиньпинни келаси ой Украинадаги урушни муҳокама қилиш учун учрашишга таклиф қилди. Бу ҳақда манбаларга таяниб, “The Wall Street Journal” хабар берди.

Маълум қилинишича, Кремль учрашувни 18–19 ноябрь кунлари Хитойнинг Шэньчжэнь шаҳрида бўлиб ўтадиган Осиё-Тинч океани иқтисодий ҳамкорлиги (APEC) саммити доирасида ўтказишни таклиф қилган.

Россия Президенти матбуот котиби Дмитрий Песков учрашув имконияти муҳокама қилинаётганини тасдиқлаган. Бироқ у ҳозирча учрашув санаси аниқ эмаслигини билдирган.

АҚШ маъмуриятининг юқори мартабали вакилига кўра, Дональд Трамп ҳозирча бундай саммитни ўтказишга розилик бермаган. Россия разведкасининг собиқ ходими эса WSJ нашрига Путин бу таклифни 9 октябрь куни Трамп билан телефон орқали суҳбатлашганида илгари сурганини айтган. Айнан шу суҳбат давомида АҚШ Россиядан дизель ёқилғиси олиш бўйича келишувга эришган.

Хитой бўйича тадқиқот олиб борувчи таҳлилчилар фикрича, уч томонлама саммит Си Цзиньпиннинг мамлакатни халқаро дипломатияда муҳим воситачи сифатида кўрсатиш ҳаракатларида катта қадам бўлиши мумкин.

Москва ушбу ғояни дипломатик каналлар орқали Пекинга таклиф қилган. Хитой томони эса Трамп ҳам рози бўлган тақдирда, бундай учрашувга қарши эмаслигини билдирган.

“Хитой буюк давлатлар ўртасидаги муносабатларда марказий давлат, шунингдек, АҚШ ва Россия ўртасида воситачи сифатида кўрилишни истайди”, дейди Вашингтондаги Стимсон тадқиқот марказининг Хитой дастури директори Юн Сун.

Маржона Маманиёзова