Путин-Трамп учрашуви бекор қилинди

Вашингтон Россия Президенти Владимир Путин ва Оқ уй раҳбари Дональд Трамп ўртасидаги саммитга тайёргарликни тўхтатди. Бу ҳақда NBC News мухбири Гаррет Хааке Оқ уйнинг юқори мартабали мулозимига таяниб маълум қилди.

Унинг айтишича, Россия ва АҚШ Президентлари ўтган ҳафтада ўтказилган телефон қўнғироғидан сўнг ушбу қарорга келган. Вазиятдан хабардор европалик дипломатларга кўра, Трамп ҳозирда на Россия, на Украина музокараларда олдинга силжишга тайёр эмас, деб ҳисоблайди.

“Reuters”нинг ёзишича, Трамп яқин икки ҳафта ичида ўтказишни умид қилган Будапештдаги учрашув Путин ўзининг радикал талабларидан воз кечишга тайёр эмаслиги аён бўлгач, шубҳа остига қўйилди. Ташқи ишлар вазири Сергей Лавров ва Давлат котиби Марко Рубио ўртасида шу ҳафтага мўлжалланган тайёргарлик учрашуви бекор қилинди. Бу америкаликлар саммитни олға силжишга тайёр эмаслигини англатади.

16 октябрь куни АҚШ Президенти Венгрияда Путин билан учрашишини маълум қилганди. Музокараларнинг аниқ санаси ҳали белгиланмаганди. Учрашув куни номаълум бўлсада, Будапешт унга жуда аъло даражада ўтказиш учун тайёргарликни бошлаб юборганди. Ҳаттоки, Венгрия Ташқи ишлар вазири Петер Сийярто Россия Президенти Владимир Путиннинг АҚШ Президенти Дональд Трамп билан учрашиш учун Будапештга ташрифи чоғида Халқаро жиноий суд (ХЖС) буйруғи асосида ҳибсга олиниши хавфи йўқлигини маълум қилди.

Венгрия 1999 йилда Халқаро жиноий суднинг асосини ташкил этувчи Рим статутини имзолаган ва 2001 йилда уни ратификация қилган, бироқ 2023 йилдаёқ мамлакат расмийлари Путин ташриф буюрган тақдирда у ҳибсга олинмаслигини айтган.

2025 йилда Венгрия ҳукумати Исроил Бош вазири Биньямин Нетаньяхуни мамлакатга таклиф қилди. Нетаньяхунинг ташрифи ортидан Венгрия Халқаро жиноий суддан чиқишини эълон қилди. 2025 йилнинг октябрь ҳолатига кўра, Венгриянинг ХЖСдан чиқиши тугалланмаган эди.

Эслатиб ўтамиз, жорий йилнинг 8 октябрь куни Россия Президенти Владимир Путин давлат ташрифи билан Тожикистонга келганди. Аммо Раҳмон ҳукумати Путинни ҳибсга олмади. Европа Иттифоқи Путинни ҳибсга олмагани учун Тожикистонни Халқаро жиноий суд талабларини бажармаганликда айблади. Сабаби Тожикистон 2002 йилдан бери Халқаро жиноий суд аъзоси саналади.