ЕИ Путин ҳибсга олинмагани учун Тожикистонни танқид қилди

Европа Иттифоқи Россия Президенти Владимир Путинни ҳибсга олмагани учун Тожикистонни Халқаро жиноий суд (ХЖС) талабларини бажармаганликда айблади. Бу ҳақда Европа ташқи алоқалар хизмати баёнотида маълум қилинди.

Баёнотда айтилишича, Тожикистон Халқаро жиноий суднинг Рим статутига аъзо давлат сифатида ўз мажбуриятларини бажармаган, чунки у Путинни ҳибсга олиш бўйича ордерни ижро этмаган ва саммитда уни тантана билан кутиб олган. 

ЕИ, шунингдек, халқаро ҳуқуқ асосида барча жиноятлар учун жавобгарликка тортиш саъй-ҳаракатларига қатъий қўллаб-қувватловини билдирган.

“Европа Иттифоқи Халқаро жиноий суд прокурори томонидан Украинада олиб борилаётган терговни қўллаб-қувватлайди ва барча давлатларни ҳамкорликка чақиради. Биз ХЖС мустақиллигини, шунингдек, Украинанинг халқаро тан олинган чегараларидаги суверенитети ва ҳудудий яхлитлигини қатъий ҳимоя қиламиз”, дейилади ушбу баёнотда. 

Маълумки, Тожикистон 2002 йилдан бери Халқаро жиноий суд аъзоси саналади. Ҳозирда Путин мамлакатда Россия–Марказий Осиё саммити ҳамда Мустақил Давлатлар Ҳамдўстлиги йиғилишида иштирок этмоқда.

Шундай қилиб, Тожикистон Путинни ҳибсга олиш ордерини бажаришдан бош тортган ХЖСга аъзо иккинчи давлат бўлди. 2024 йилда шунга ўхшаш ҳолат Монголияда содир бўлган эди, у ерда Путинни тантанали тарзда кутиб олишган.

Эслатиб ўтамиз, аввалроқ Россия Президенти Бразилияда ўтган BRICS саммитида қатнашмаганди. Бразилия ҳам Рим статутига имзо чеккан давлат ҳисобланади.