Путин сулҳдан воз кечмоқчи, аммо буни Трампга айтишдан қўрқади – Зеленский

Украина Президенти Владимир Зеленскийнинг фикрича, Россия раҳбари Владимир Путин АҚШнинг Украина билан 30 кунлик сулҳ тузиш таклифидан воз кечмоқчи. Бунинг учун у бажариб бўлмайдиган талабларни қўяди. Бу ҳақда у кеча, 13 март куни ўз видео мурожаатида сўз очди. 

“Ҳозир биз ҳаммамиз Россиядан Путиннинг фронтда тинчлик ғоясига жавобан жуда башоратли, жуда манипулятив сўзларини эшитдик – у амалда ҳозирги ҳолатга кўра рад жавобини тайёрламоқда”, дейди Зеленский.

Шунингдек, Зеленский Путин Трампга урушни давом эттириш ва украиналикларни ўлдириш нияти ҳақида тўғридан тўғри айтишдан қўрқаётганини ҳам айтиб ўтган.

“Путин кўпинча шундай қилади – тўғридан тўғри “йўқ” демайди, лекин шундай йўл тутадики, деярли ҳамма нарса чўзилиб кетади ва нормал ечимлар имконсиз бўлиб қолади. Биз буларнинг барчасини ҳозир Россиянинг навбатдаги манипуляциялари, деб ҳисоблаймиз”, дея қўшимча қилган Президент.

Унинг сўзларига кўра, АҚШ келишув режимини назорат қилиш ва текширишни таъминлашни таклиф қилган.

“Биз бирор нарсани мураккаблаштирадиган шартларни қўймаймиз. Буни Россия қилмоқда. Доим айтганимиздек, ҳамма нарсани чўзадиган, конструктив бўлмайдиган ягона одам – бу Россия. Уларга уруш керак. Путин тинчлик йилларини ўғирлади ва бу урушни кунма-кун давом эттирмоқда”, деган Зеленский.

Унинг қайд этишича, ҳозир Россияга босим ўтказиш ва уни урушни тугатишга мажбурлашга ёрдам берадиган санкциялар жорий этиш керак.

Эслатиб ўтамиз, аввалроқ Зеленский Россияни тинчлик келишувини атайлаб чўзишда айблаганди. Владимир Путин эса кеча, 14 март куни Россия АҚШнинг Украинада вақтинчалик ўт очишни тўхтатиш таклифига рози экани, бироқ ҳар қандай сулҳ узоқ муддатли тинчлик ва можарога сабаб бўлган омилларнинг бартараф этилишига олиб келиши кераклигини айтди. АҚШ Президенти Дональд Трампнинг айтишича, Путиннинг Украинада мумкин бўлган ўт очишни тўхтатиш ҳақидаги баёноти “кўп нарсани ваъда қилишини”, аммо у ҳали “тўлиқ эмас”.