Путин Ларижоний вафоти муносабати билан Эронга таъзия йўллади

Россия Президенти Владимир Путин Эрон Миллий хавфсизлик олий кенгаши котиби Али Ларижонийнинг вафоти муносабати билан чуқур ҳамдардлик билдирди. Бу ҳақда Эрон давлат телерадиокомпанияси хабар берди. 

Компания Путиннинг Эроннинг янги Олий раҳбари Мужтабо Хоманаийга йўллаган мурожаатини ҳам эълон қилган.

“Жаноби олийлари, Эрон Ислом Республикаси Миллий хавфсизлик олий кенгаши котиби Али Ларижоний ҳалок бўлгани муносабати билан чуқур ҳамдардлигимни қабул қилинг. Мен бу давлат арбоби билан бир неча бор учрашганман. У доно ва узоқни кўра оладиган сиёсатчи бўлиб, ўз халқининг манфаатларини қатъий ҳимоя қилган”, деган Владимир Путин.

У ўз мурожаатида Ларижонийни Россиянинг “ҳақиқий дўсти” деб атаб, у Москва ва Теҳрон ўртасидаги стратегик ҳамкорликни ривожлантиришга катта ҳисса қўшганини таъкидлаган.

Қайд этиш жоиз, Эрон Ларижоний Исроилнинг ҳаво зарбаси оқиатида ҳалок бўлганини тасдиқлаган эди. У қизи яшайдиган Пардис ҳудудидаги уйда ўғли, ўринбосари ва бир неча қўриқчилари билан бирга ҳалок бўлган.

Эрон Президенти Масъуд Пезешкиён ҳамдардлик билдириб, бу ҳодиса учун “қаттиқ қасос олиниши”ни ваъда қилган. Ташқи ишлар вазири Аббос Ароқчи эса Ларижоний ўлими мамлакат сиёсатига таъсир қилмаслигини таъкидлаган.

Ларижоний ва Путин алоқалари

Али Ларижоний узоқ йиллар давомида Эрон сиёсатида муҳим шахс бўлган. 2005–2007 йилларда Миллий хавфсизлик олий кенгаши котиби сифатида ядровий дастур бўйича бош музокарачи бўлган. 2015 йилда парламент спикери сифатида ядровий келишувни муҳокама қилишда фаол иштирок этган.

У Владимир Путин билан бир неча бор учрашган:

• 2015 йил октябрда Сочида
• 2026 йил январда Москвада

Учрашувларда икки томонлама иқтисодий ҳамкорлик масалалари муҳокама қилинган.