Путин илк бор Wildberries’га ҳужумлар ҳақида гапирди (видео)

Россия Президенти Владимир Путин Украинадаги ҳужумлар оқибатида зарар кўрган логистика ва омборлар сиғимларини тиклаш кераклигини айтди. Бу ҳақда у бугун, 19 август куни Стратегик ривожланиш ва миллий лойиҳалар кенгаши йиғилишида сўз очди.

Путиннинг сўзларига кўра, зарар кўрган объектларни тиклашда давлат ҳам иштирок этиши лозим. У, шунингдек, Россия ҳукуматига мамлакатдаги логистика қувватларини тиклаш бўйича дастур қабул қилишни топширган.

“Бунда зарар кўрган объектларни сифат жиҳатидан янги технологик даражада тиклаш керак“, деган Путин.

Россия Президенти Украинадаги ҳужумлар саноат ва инфратузилма объектларига зарар етказаётгани, бунинг оқибатида Россия иқтисодиётига ҳам салбий таъсир кўрсатилаётганини айтган. Бироқ у бундай ҳужумлар мамлакат учун жиддий оқибатларга олиб келмаётганини ҳам таъкидлаган.

“Албатта, бундай ҳужумлар бизга зарар етказмоқда. Бу аниқ. Биз буни тушунамиз, кўриб турибмиз ва биламиз“, деган у.

Путин нутқида Wildberries компаниясини бевосита тилга олмаган. Бироқ унинг баёноти июль ойидан бери Украинадаги ҳужумларга учраётган Wildberries’нинг Россиядаги логистика марказлари фонида янграган. “Reuters“ маълумотларига кўра, июль ўрталаридан бери компаниянинг йигирмага яқин омбори ҳужумлардан зарар кўрган.

Эслатиб ўтамиз, аввалроқ маркетплейс омборларига дронлар ҳужумидан Wildberries ва платформа сотувчиларига етказилган умумий зарар 600–800 миллиард рублга баҳоланаётгани ҳақида хабар берилган эди.