ПСЖнинг юзлаб мухлислари ҳибсга олинди

Франция ҳуқуқ-тартибот идоралари ходимлари Париж ва унинг атрофидаги шаҳарларда “Пари Сен-Жермен” жамоасининг Чемпионлар лигаси финалига чиққанидан кейин юзага келган тартибсизликлар вақтида 127 кишини ҳибсга олди. Бу ҳақда Франция Ички ишлар вазири Лоран Нуньес маълум қилди.

Вазирнинг сўзларига кўра, ҳибсга олишларнинг аксарияти пойтахт Парижда амалга оширилган. “Пари Сен-Жермен” кеча, 6 май куни Чемпионлар лигаси ярим финалининг жавоб учрашувида Германиянинг “Бавария” жамоаси билан дуранг ўйнади ва икки ўйин натижасига кўра финалга йўл олди.

“Тартибсизликлар натижасида Париж метрополитен ҳудудида 127 киши ҳибсга олинди, улардан 107 нафари Парижда қўлга олинган”, дейди Нуньес CNews телеканалига берган интервьюсида.

Вазирнинг таъкидлашича, тартибсизликлар давомида 11 киши жароҳат олган. Улардан бирига тартибсизлик қатнашчилари томонидан ўқотар қурол ишлатилиши оқибатида оғир тан жароҳати етган. Шунингдек, тартибни тиклаш жараёнида 23 нафар ҳуқуқни муҳофаза қилувчи орган ходими енгил жароҳатланган.

Нуньеснинг сўзларига кўра, полициянинг тезкор аралашуви туфайли дўконларни талон-торож қилиш ва ҳалқа йўлини тўсиб қўйишга бўлган уринишларнинг олди олинган.

“Пари Сен-Жермен”нинг йирик ғалабаларидан кейинги бундай тартибсизликлар Франция пойтахтида деярли одатий ҳолатга айланган. Шунга қарамай, полиция бундай ҳолатларга муроса қилмаслиги ва келажакда ҳам кескин чоралар кўришини вазир алоҳида таъкидламоқда.

Маълумот учун, ПСЖ кетма-кет иккинчи йил Чемпионлар лигаси финалига чиқди. Финал учрашуви жорий йилнинг 30 май куни Будапешт шаҳрида бўлиб ўтади.