ПСЖ Альваресни сотиб олмоқчи

Франциянинг “Пари Сен-Жермен” клуби аргентиналик ҳужумчи Хулиан Альварес трансфери учун “Атлетико Мадрид” билан музокараларни бошлади. Бу ҳақда “El Chiringuito” нашри хабар берди.

Манбага кўра, парижликлар португалиялик ҳужумчи Гонсало Рамос билан хайрлашиб, унинг трансферидан тушадиган маблағни аргентиналик футболчини харид қилишга йўналтиришни режалаштирмоқда. Париж клуби тез орада дастлабки расмий таклифни юбориши кутилмоқда.

Шунингдек, “Арсенал” ҳам ушбу ҳужумчини ҳужум чизиғини кучайтириш учун асосий мақсадлардан бири сифатида кўриб чиқмоқда ва трансфер жараёнини бошлашга тайёр.

Манбага кўра, ПСЖ 26 ёшли аргентиналик футболчи учун 150 миллион евродан ортиқ маблағ тўлашга тайёр.

Альварес “Атлетико” сафида 2024 йил ёзидан буён тўп суриб келмоқда. Жорий мавсумда у барча мусобақаларда 49 та ўйинда майдонга тушиб, 20 та гол урди ва 9 та голли узатмани амалга оширди.

Маълумот учун, Альвареснинг мадридликлар билан амалдаги шартномаси 2030 йил ёзига қадар мўлжалланган. “Transfermarkt” маълумотига кўра, унинг бозор қиймати 90 миллион еврони ташкил этади.