Президент Сирдарё вилояти таълим бошқармаси бошлиғини мукофотлади (видео)

Сирдарё вилояти мактабгача ва мактаб таълими бошқармаси бошлиғи Наргиза Ибодуллаевна Холбоева “Дўстлик” ордени билан мукофотланди. Бу ҳақда бугун, 14 февраль куни Президент Шавкат Мирзиёевнинг тегишли фармони эълон қилинди. 

Кеча, 13 февраль куни Ўзбекистон Республикаси Президенти, Миллий Олимпия қўмитаси раиси Шавкат Мирзиёев бошчилигида ўтказилган олимпия ва паралимпия ҳаракати, ихтисослаштирилган ва оммавий спортни янги босқичга олиб чиқиш ҳамда аҳоли жисмоний фаоллигини ошириш чора-тадбирлари бўйича видеоселектор йиғилишида Холбоева ҳам иштирок этган ва сўзга чиққан эди.

“Беш ташаббус олимпиадаси сиз ўзингиз томонингиздан белгилаб берилган ушбу ўн уч турдаги спорт олимпиадасининг ўтказилиши 66 фоиз кўрсаткични қайд этган. Лекин ваъда бераманки, агар биз жисмоний тарбия фани ўқитувчилари билан оммавий спорт тренерини узвийликда ҳамкорликда ишини олиб борадиган бўлсак, беш ташаббус олимпиадаси 80 фоиз эмас, балки 100 фоизга ҳам чиқарсак бўлади. Чунки ҳамма шароит бор, ҳамма имконият бор, фақатгина фидойилик керак, фақатгина садоқат керак. 

Муҳтарам Президент, ҳозир сизнинг ўз нутқингизни эшитиб туриб, соғлом зурриёт сўзини 8 маротаба қайта-қайта айтдингиз-да, чиндан ҳам мана шу соғлом зурриётни, соғлом авлодни мактабгача ва мактаб таълимидан бошлашимиз зарурлигини бугун ўзимга белгилаб олдим. Албатта, бу борада режаларимни ҳам қилиб олдим: қайтадан йўл хариталарини ишлаб чиқаман, қайтадан чора-тадбирларни ишлаб чиқиб, сўз бераманки, Сирдарё вилоятида оммавий спорт турларини, умуман олганда, мана шу партада ўтирган жажжи иқтидор эгаларини спорт мактабларига профессионал спортчи қилиб етказиб беришда захира фондини яратиб беришга бор имкониятимни ишга соламан”, деган Холбоева.

Президент эса таълим бошқармасида шундай замонавий, фидойи шахс пайдо бўлганидан хурсанд эканини билдирган.

“Бугун мажлисимизда мана соғлом зурриёт, соғлом халқ деб гапириб биринчи бўлиб бошлаганимда, она сифатида тўғри тушунганингиз, аёл сифатида тўғри тушунганингиз учун мен сизни “Дўстлик” ордени билан мукофотлаб, ўзим фармонга қўл қўяман. Мен 80 фоиз демас, сиз 100 фоиз деганингиз менга ғурур бағишлайди. Сизга ўхшаганлар менинг жонкуяр қизларим бор экан, йўлимиз тўғрилигидан далолат. Мен сизни орден билан табриклайман. Сизнинг мисолингизда ҳамма сизнинг соҳангиздагилар ўрнак олсин. Барибир, меҳнат қилган одам адолатли мукофот олади. Чарчаманг! Сирдарё биринчи ўринга чиқишига мен ишонаман. Табриклайман, қизим!” деган Мирзиёев.

Эслатиб ўтамиз, Президент Шавкат Мирзиёев кечаги видеоселектор йиғилишида яқинда оила қурган Паралимпиада чемпиони Асила Мирзаёровани ҳам табриклаганди.