Португалияда уй-жой нархларига қарши норозиликлар авж олди

Португалияда уй-жой нархларининг ошишига қарши минглаб одамлар намойишга чиқди. Полиция Лиссабон ва Порту шаҳарларидаги норозилик лагерларини тарқатиб юбориб, 55 кишини қўлга олганидан кейин ҳам фаоллар намойишларни давом эттиришини билдирмоқда. Бу ҳақда DW хабар берди.

Қайд этилишича, кеча, 20 октябрь куни эрталаб полиция Лиссабон ва Порту шаҳарларида намойишчилар ўрнатган чодирларни олиб ташлаш бўйича амалиёт ўтказган. Лиссабон марказидаги Россиу майдонида фаоллар 17 октябрдан бери қарийб 200 та чодир тикиб, уй-жой нархларининг ошишига қарши норозилик билдираётган эди. Порту шаҳрида эса намойишчилар Дом Жоао I майдонида қарийб 10 кундан бери лагер ташкил қилган.

Полиция ҳаракатлари давомида жами 228 та чодир ва лагерга тегишли бошқа буюмлар олиб ташланган. Портуда эса полиция аралашуви мумкинлигидан огоҳлантирганидан сўнг намойишчилар чодирларини ўзлари йиғиштириб олган. Лиссабонда эса полиция майдонни бўшатишга киришганида фаоллар инсон занжирини ҳосил қилган. Маҳаллий телеканаллар намойишчилар ва полиция ўртасида тўқнашувлар юз берганини кўрсатувчи лавҳаларни намойиш қилган.

Лиссабондаги лагер вакили Карла Валадау полиция ҳаракатларини жуда тажовузкор деб баҳолаган. Бироқ Жамоат хавфсизлиги полицияси бошлиғи Сержиу Соареш амалиёт тинч ва мутаносиб тарзда ўтказилганини, полиция намойишчиларга қарши ҳужум қилмаганини билдирган. Қўлга олинган 55 кишининг барчаси кейинчалик судга келиш шарти билан озод қилинган.

Намойишчилар кеча, 20 октябрь куни кечқурун Лиссабон, Порту ва бошқа шаҳарларда яна кўчаларга чиққан. Ташкилотчиларнинг айтишича, Лиссабон ва Портудаги ҳар икки асосий намойиш жойида мингдан ортиқ киши тўпланган. Лиссабондаги Россиу майдонида фаоллар 21 октябрь куни чодир лагерини қайта тиклаш учун овоз берган.

Португалияда уй-жой инқирози сўнгги йилларда кескинлашган. 2017 йилдан буён уй-жой сотиб олиш нархлари икки баробардан кўпроқ ошган, янги ижара шартномалари бўйича тўловлар эса деярли икки баробар кўпайган. Айниқса, Лиссабон ва Порту шаҳарларида яшаш харажатлари аҳоли учун жиддий муаммога айланган.

Намойишчилар марказ-ўнг ҳукумат таклиф қилган, ижарачиларни уйдан чиқаришни осонлаштириш ва янги ижара шартномалари учун белгиланган нарх чекловларини бекор қилишни назарда тутувчи қонун лойиҳасига қарши чиқмоқда. Улар ҳукуматдан ушбу лойиҳани қайтариб олишни талаб қилмоқда. Ҳужжат парламентдаги дастлабки ўқишдан ўтган.

Португалиядаги намойишлар Европанинг бошқа мамлакатларида ҳам уй-жой нархлари ва яшаш харажатларининг ошишига қарши норозиликлар кучаяётган бир пайтда юз бермоқда. Испанияда ҳам фаоллар ижарачилар ҳуқуқларини кучлироқ ҳимоя қилишни талаб қилмоқда.

Эслатиб ўтамиз, Францияда жорий йилнинг 17 октябрь куни юз берган тартибсизликлар бўйича ишларнинг судда кўриб чиқилиши якунларига кўра, қарийб 150 киши қамоқ жазосига ҳукм қилингани ҳақида хабар берилган эди.