Польшада Россиянинг сўнгги бош консулхонаси ёпилди

Бугун, 22 декабрь куни Польшада Россия Федерациясининг охирги бош консулхонаси ўз фаолиятини тўхтатди. Бу ҳақда РИА Новости хабар берди.

Нашрнинг ёзишича, Польшанинг Гданьск шаҳридаги Россия бош консулхонаси ўз ишини якунлаган. Шу тариқа, Польша ҳудудида россияликлар ва хорижий фуқароларга консуллик хизматлари энди фақат Варшавадаги Россия элчихонасининг консуллик бўлими орқали кўрсатилади.

Қайд этиш жоиз, жорий йил ноябрь ойи ўрталарида Польша Ташқи ишлар вазирлиги Россиянинг Гданьскдаги консуллик ваколатхонасининг фаолият юритишига берилган рухсатни бекор қилишга қарор қилганини эълон қилганди. Бунга Польшанинг Мазовия воеводлиги полицияси Украинага олиб борувчи темирйўл линиясига шикаст етказилгани ҳақида хабар бергани сабаб бўлган.

Шундан сўнг Польша бош вазири Дональд Туск темирйўлдаги диверсияни Украинадан бўлган икки нафар фуқаро содир этганини, улар Россия билан ҳамкорлик қилганини маълум қилди. Россия Президенти матбуот котиби Дмитрий Песков эса темирйўлдаги диверсия билан боғлиқ вазиятда украиналикларнинг тилга олиниши эътиборга молик эканини таъкидлади. Унинг айтишича, Польшада Россия гибрид урушнинг барча кўринишларида айбланади ва Москва темирйўлдаги диверсияда ҳам айбланмагани “ғалати бўлар эди”.

Ноябрь охирида Россия Ташқи ишлар вазирлиги Польша элчисига жорий йил 30 декабрдан бошлаб Иркутск шаҳридаги Польша бош консулхонасининг фаолиятига розилик бекор қилиниши ҳақида нота топширилганини маълум қилди. Бу қарор Польша ҳукумати Россиянинг Гданьскдаги бош консулхонаси фаолиятига берилган розиликни қайтариб олганига жавоб чораси сифатида қабул қилинган.

Эслатиб ўтамиз, 2024 йил октябрь ойида Польша Россиянинг Познандаги бош консулхонасини, 2025 йил май ойида эса Краковдаги бош консулхонасини ёпган эди. Бунга жавобан Россия Польшанинг Санкт-Петербург ва Калининграддаги консулхоналарининг фаолиятига берилган розиликни бекор қилган.