Польшада 400 ёшли аёлнинг юзи тикланди

Польшада олимлар жамоаси ДНК, 3D ва лойни моделлаштиришдан фойдаланиб, 400 ёшли аёлнинг юзини қайта тиклади. Бу ҳақда “Sky News” хабар берди.

У мамлакат шимолидаги Пиен шаҳридаги номаълум қабристонга дафн қилинган. Қабр топилганда марҳумнинг бўйни атрофида темир ўроқ топилган ва унинг оёғи қулфланган.

Маҳаллий аҳоли томонидан Зосия исми берилган ушбу марҳум қолдиқлари 2022 йилда Польшадаги Николай Коперник университети археологлари гуруҳи томонидан топилган.

Мутахассисларнинг фикрига кўра, ўша пайтда қабр жойидан топилган ўроқ ва қулф, шунингдек, айрим турдаги ёғочлар “вампир”лардан ҳимоя қилувчи сеҳрли хусусиятларга эга эканига ишонилган.

Зосиянинг қолдиқлари таҳлили шуни кўрсатадики, у вафот этганида 18 ёшдан 20 ёшгача бўлган ва ҳушидан кетиш, кучли бош оғриғи ва руҳий саломатлик билан боғлиқ муаммоларга олиб келиши мумкин бўлган касалликдан азият чеккан. Мутахассислар реконструкцияни бош суякнинг 3D-босма нусхасини яратишдан бошлаб, аста-секин пластилинли лойдан аёлнинг ҳаётдагига ўхшаш юз ҳосил қилган. Суяк тузилиши юз хусусиятларининг чуқурлигини баҳолаш учун жинси, ёши, этник келиб чиқиши ва тахминий вазни ҳақидаги маълумотлар билан бирлаштирилган.

Археолог Оскар Нильссоннинг сўзларига кўра, топилган бошқа жасадлар орасида юзи пастга кўмилган ва оёғи қулфланган “вампир” деб номланган бола ҳам бор эди. Зосиянинг ҳаёти ҳақида кам нарса маълум, аммо унинг бой-бадавлат оиладан бўлгани аниқ.

Эслатиб ўтамиз, аввалроқ Францияда уйининг ертўласини таъмирлаётган эркак одам скелетига дуч келганди. Бу воқеа қазишмалар олиб боришга сабаб бўлиб, оқибатда ўнлаб қабрлардан иборат 700 йиллик қабристон топилганди.