Пезешкиён урушни тугатиш учун товон пули талаб қилди

Эронга қарши урушни тугатишнинг ягона йўли – мамлакатнинг қонуний ҳуқуқларини тан олиш, республикага товон пули тўлаш ва келажакдаги ҳужумлардан халқаро хавфсизлик кафолатларини беришдир. Бу ҳақда Эрон Президенти Масъуд Пезешкиён ўзининг Х ижтимоий тармоғида ёзиб қолдирди. 

Унинг таъкидлашича, Россия ва Покистон раҳбарлари билан суҳбатда Эрон минтақада тинчликни таъминлашга содиқ эканини билдирган.

“Сионистик режим ва АҚШ бошлаган бу урушни тугатишнинг ягона йўли – Эроннинг қонуний ҳуқуқларини тан олиш, репарациялар тўлаш ва келажакдаги тажовуздан мустаҳкам халқаро кафолатлар беришдир”, деган Пезешкиён. 

Аввалроқ, ОАВда Теҳрон Вашингтондан хавфсизлик кафолатларини талаб қилаётгани ҳақида хабарлар тарқалди. Бироқ, бу кафолатлар урушни дарҳол тўхтатиш учун эмас, балки уни якунлаш бўйича музокараларни бошлаш шарти сифатида қўйилган.

Маълум қилинишича, Теҳрон Вашингтондан келажакда ҳужум қилмаслик бўйича кафолат, зарар учун компенсация ҳамда Эрон ўз атом энергетика объектларида тўлиқ ядровий ёқилғи циклини амалга ошириш ҳуқуқини тан олишни талаб қилмоқда.

Шу билан бирга, АҚШ Президенти Дональд Трамп АҚШ Эрон билан фақат унинг тўлиқ таслим бўлишига оид келишувни имзолашга тайёр эканини билдирган. Унинг сўзларига кўра, АҚШ кўп жиҳатдан аллақачон устунликка эришган, аммо бу етарли эмас ва мамлакат рақибини тўлиқ мағлуб этмоқчи. 

Эслатиб ўтамиз, аввалроқ АҚШ Исроилдан Эроннинг энергетика, айниқса нефть инфратузилмаси объектларига зарба беришни тўхтатишни сўрагани ҳақида хабар берилганди.