Перуда 83 ёшли президент сайланди

Перу қонун чиқарувчилари 83 ёшли парламент раиси Хосе Мария Балькасарни мамлакатнинг вақтинча президенти этиб сайлади. Бу ҳақда “Bloomberg” хабар берди.

Нашр маълумотига кўра, сўл партия вакили бўлган Балькасар 2021 йилда бошланган президентлик муддатининг қолган беш ойи давомида Перуни бошқаради. У 2021 йилдан буён тўртинчи, 2016 йилдан бери эса тўққизинчи президентга айланди. Собиқ тўрт нафар давлат раҳбари ҳозирда қамоқда. Хосе Мария Балькасар ўнг партия вакилларидан кейин лавозимга келган биринчи сўлчи президент бўлади.

Балькасар илгари болалар никоҳини тақиқлашга қарши чиққан, 14 ёшдан никоҳга рухсат беришни таклиф қилган ва ўқитувчилар кўпинча ўқувчи қизлар билан интим муносабатларга киришишини айтган. Кейинчалик у сўзлари контекстдан узиб олинганини билдирган.

Эслатиб ўтамиз, 17 февраль куни Перу Конгресси президент Хосе Херига нисбатан ишончсизлик вотумини эълон қилганди. Бунга 2025 йил декабрида давлат раҳбарининг расмий жадвалга киритилмаган ҳолда хитойлик тадбиркорлар билан учрашувлари сабаб бўлган. Мамлакат прокуратураси ушбу ҳолат юзасидан тергов олиб бормоқда.