Парижда намойишчилар Лувр музейига киришни тўсиб қўйди

Франция пойтахти Парижда намойишчилар яшаш харажатларининг ошишига қарши норозиликларни қўллаб-қувватлаш мақсадида Лувр музейига кириш йўлларини тўсиб қўйди. Оқибатда музей белгиланган вақтда ташриф буюрувчилар учун очилмади. Бу ҳақда “Euronews” хабар берди.

Бугун, 19 октябрь куни ўтказилган акцияда Лувр мактаби (École du Louvre) талабалари етакчилик қилган. Улар Францияда сўнгги ҳафталарда давом этаётган норозилик намойишларини қўллаб-қувватлаб, полициянинг намойишчиларга нисбатан ҳаракатларини қоралаган.

Музей ташқарисига осиб қўйилган варақада намойишчилар дунёдаги энг йирик музейлардан бирига киришни тўсиб қўйганини эълон қилган. Акция ташкилотчилари шу йўл билан жамоатчилик эътиборини мамлакатдаги ижтимоий муаммоларга қаратишга уринган.

Францияда норозиликлар дастлаб ўрта мактаб ўқувчиларининг таълим муассасаларидаги шароитларни яхшилаш талаби билан бошланган. Кейинчалик улар яшаш харажатларининг ошиши ва бошқа ижтимоий муаммоларга қарши кенгроқ ҳаракатга айланган.

Дам олиш кунлари мамлакатнинг бир қатор ҳудудларида намойишлар зўравонлик билан кечган. Айрим гуруҳлар полицияга ҳужум қилган, давлат идоралари ва бошқа жамоат биноларига зарар етказган, дўконларни талаган ҳамда транспорт воситаларига ўт қўйган.

Франция Президенти Эммануэль Макрон хавфсизлик чораларини қайта кўриб чиқишни топширган. Мамлакат ички ишлар вазири Лоран Нуньес эса тартибсизликлар вақтида хавфсизлик кучлари вазиятни назорат қилишда қийинчиликларга дуч келганини тан олган.

Норозиликлар Европанинг бошқа мамлакатларида ҳам кузатилмоқда. Италия, Испания ва Португалияда яшаш харажатлари ҳамда уй-жой нархларининг ошишига қарши акциялар ўтказилган.

Эслатиб ўтамиз, аввалроқ Франциядаги тартибсизликлардан кейин Италиянинг Милан шаҳрида ҳам яшаш харажатлари ошишига қарши намойишлар тўқнашувларга айлангани ҳақида хабар берилган эди.