Ослода Норвегия терма жамоаси қаҳрамондек кутиб олинди

Норвегия пойтахти Ослода 2026 йилги Жаҳон чемпионатидан қайтган миллий терма жамоани кутиб олиш учун Акер-Брюгге соҳилига қарийб 100 минг нафар мухлис йиғилди. Бу ҳақда “reuters” нашри хабар берди.

Терма жамоа футболчиларини олиб келган автобус майдонга етиб келгач, бутун оломон бир вақтнинг ўзида чўккалаб, турнир давомида интернетда оммалашган норвегиялик мухлисларнинг машҳур “эшкак эшиш” байрамона ҳаракатини бажарди.

Мухлисларнинг ўз жамоасини бундай қизғин қарши олиши бежиз эмас. Норвегия терма жамоаси Жаҳон чемпионатида чорак финалгача етиб бориб, мамлакат футболи тарихидаги энг яхши натижасини қайд этди. Скандинавияликларни чорак финалда Англия 2:1 ҳисобида мағлуб этди.

Ушбу учрашув баҳсли вазиятларга бой ўтди. Иккинчи бўлимда ҳакамлар Норвегиянинг ҳисобни тенглаштирувчи голини инобатга олмади, шунингдек, Эрлинг Ҳоландга нисбатан қоидабузарлик қайд этилди. Кўплаб мутахассислар ҳакамнинг ушбу қарорини баҳсли деб баҳолади, аммо ҳисоб ўзгармади.

Шунга қарамай, чорак финалгача етиб боришнинг ўзи норвегиялик мухлисларнинг миллий терма жамоага бўлган муносабатини тубдан ўзгартирди.