Орбан Трамп билан учрашди

Венгрия Бош вазири Виктор Орбан кеча, 9 декабрь куни АҚШнинг сайланган президенти Дональд Трамп ва миллиардер Илон Маск билан учрашди. Бу ҳақда “The Hill” хабар берди.

Трамп Орбанни Флоридадаги Мар-а-Лаго қароргоҳида кутиб олган. Мазкур учрашувда АҚШнинг Mиллий хавфсизлик бўйича маслаҳатчиси Майкл Вальс ва Венгрия Ташқи ишлар вазири Петер Сийярто ҳам иштирок этган.

“Доналъд Трамп ва Илон Маск билан Мар-а-Лагода бир кун”, деб ёзган Орбан ўзининг Facebook  ижтимоий тармоғидаги саҳифасида.

Трампнинг Флоридадаги саройига Маск кичик ўғли билан ташриф буюрган. Бу ҳақда у ўзининг ижтимоий тармоқдаги саҳифасида маълум қилган.

Маълумот учун, бу йил Орбан ва Трамп Мар-а-Лаго қароргоҳида учинчи марта учрашди. Венгрия Бош вазири АҚШдаги сайловолди кампаниясида республикачи номзодни очиқ қўллаб-қувватлаган ва унинг Оқ уйга қайтишига умид қилишини яширмаган.

Президентлик сайловларидан сўнг дарҳол Орбан дунё етакчилари орасида биринчилардан бўлиб Трампни ғалабаси билан табриклаб, бу барча давлатлар учун яхши бўлишини таъкидлаган.

Шунингдек, Венгрия Украинадаги можарони ҳал этишда Трампдан умид қилмоқда. Трамп 20 январдан ўз лавозимини эгаллаши билан бу муаммони ҳал қилишни ваъда берган.

Орбаннинг таъкидлашича, агар Трамп иккинчи муддатда АҚШ раҳбари бўлиб қолганида, у Украина инқирозининг олдини олган бўларди. Бундан ташқари, Будапешт ҳам демократ Жо Байден маъмурияти даврида сезиларли даражада ёмонлашган Вашингтон билан муносабатларни яхшилашга умид билдирмоқда.

Эслатиб ўтамиз, жорий йилнинг 7 декабрь куни Парижда Украина Президенти Владимир Зеленский ва Франция етакчиси Эммануэль Макрон ҳамда АҚШнинг сайланган президенти Дональд Трамп ўртасидаги учрашув бўлиб ўтганди. 

Моҳинур Каримова