Норвегияда 100 дан ортиқ уй ёниб, култепага айланди (видео)

Кеча, 17 июль куни Норвегия жанубидаги Драммен коммунасида юз берган йирик ёнғин 100 дан ортиқ уйни култепага айлантирди, бир неча юзлаб одамлар эвакуация қилинди. Бу ҳақда NRK хабар берди.

“Жума куни куннинг иккинчи ярмидан бошлаб Крокстадельв шаҳрида жуда кучли ёнғин қутурмоқда... 100 дан ортиқ уйга бутунлай шикаст етган ва бир неча юзлаб одамлар эвакуация қилинган”, дейилади хабарда.

Телеканал маълумотларига кўра, полицияга хонадонлардан бирида ёнғин чиққани ҳақида хабар келиб тушган, сўнгра олов бошқа уйлар ва атрофга тарқалган. Камида уч киши, жумладан, бир нафар ўт ўчирувчи жароҳатланган. Бундан ташқари, саккиз нафар полиция ходими тутундан заҳарланган.

Вестфолл минтақалараро ёнғин хавфсизлиги хизмати бошлиғи Ян Хельге Кайсернинг сўзларига кўра, бугун, 18 июль куни эрталаб ёнғин қуршаб олинган, бироқ ўчириш ишлари кун давомида ҳам давом этади: тураржой ҳудудида ва атрофдаги ўрмонда ҳали ҳам бир нечта ёнғин ўчоқлари қолмоқда. Унинг айтишича, амалиётга ўнта ёнғин хавфсизлиги қисми жалб этилган. 

Эслатиб ўтамиз, аввалроқ Жазоир пойтахти яқинидаги болалар уйида содир бўлган ёнғин оқибатида камида 11 киши ҳалок бўлиб, яна 19 киши жароҳатланганди.