Нетаньяху Трампдан Эронга ҳужумни кечиктиришни сўради

Исроил Бош вазири Биньямин Нетаньяху АҚШ Президенти Дональд Трампдан Эронга қарши ҳарбий зарбаларни вақтинча кечиктиришни сўради. Бу ҳақда америкалик расмийларга таяниб, “The New York Times” нашри хабар берди.

Манбага кўра, Нетаньяху ва Трамп ўртасидаги суҳбат 14 январь куни бўлиб ўтган. Айнан шу куни Трамп ўз манбалари орқали Эронда намойишчиларнинг ўлдирилиши тўхтатилгани ва қатл қилишлар бекор қилингани ҳақида маълумот олганини айтган. Нашр талқинига кўра, бу баёнот АҚШ Президенти Эронга ҳужум қилиш ғоясидан воз кечганининг белгиси бўлган.

Шунга ўхшаш мурожаатлар АҚШнинг Яқин Шарқдаги бошқа иттифоқчиларидан ҳам келган. Қатар, Уммон, Миср ва Саудия Арабистони вакиллари сўнгги икки кун ичида америкалик ҳамкасблари билан боғланиб, Трамп маъмуриятини Эронга зарба беришдан тийилишга чақирган. Улар бундай ҳужум бутун минтақада кенг кўламли можарога сабаб бўлиши мумкинлигидан огоҳлантирган.

“Financial Times” нашри сўнгги кунларда одатда Эрон режимини ағдариш тарафдори сифатида кескин баёнотлар бериб келган Нетаньяхунинг “сезиларли даражада сукут сақлаётганига” эътибор қаратган. Газета манбасига кўра, АҚШ Президенти Эрон билан боғлиқ кўплаб масалаларни Исроил ихтиёрига топширишга тайёр.

Қайд этиш жоиз, АҚШ ҳукумати Эронга қарши эҳтимолий ҳарбий чораларни 2025 йил декабрь ойи охирида оловланган норозилик намойишлари фонида муҳокама қила бошлаган эди. Намойишларга нархларнинг кескин ошиши ва риал курсининг долларга нисбатан кескин қадрсизланиши сабаб бўлган. 

13 январь куни Трамп эронлик намойишчиларга мурожаат қилиб, уларни давлат муассасаларини эгаллашга чақирган ҳамда “ёрдам аллақачон йўлда” эканини айтган. Журналистлар билан суҳбатда АҚШ Президенти бу сўзлари билан нимани назарда тутганига аниқлик киритмаган, бироқ америкалик фуқароларнинг Эрондан эвакуация қилиш масаласи кўриб чиқилиши кераклигини билдирган. “CBS News” телеканалига берган интервьюсида эса Трамп Теҳронга нисбатан ўзининг якуний мақсади ғалаба эканини айтган, лекин бу тушунчани изоҳлаб бермаган.

Эслатиб ўтамиз, аввалроқ Бирлашган Миллатлар Ташкилоти Хавфсизлик кенгашининг фавқулодда йиғилишида Бош котиб ёрдамчиси Марта Поби эронликлар тинч ва қўрқмасдан ўз норозиликларини билдириш имкониятига эга бўлишлари кераклигини айтганди.