Непаллик эркак Эверестда 6 кун овқатсиз ва кислородсиз тирик қолди (видео)

Непаллик шерпа (тоғ йўлбошловчиси) Эверестда овқатсиз ва қўшимча кислородсиз олти кун қолиб кетиб тирик қолди. Бу ҳақда “Daily Mail” хабар берди.

Қайд этилишича, жорий йилнинг 29 май куни 52 ёшли йўлбошловчи дунёнинг энг баланд чўққисидан тушаётган вақтда ғойиб бўлган. Уни охирги марта учинчи ва тўртинчи лагерлар оралиғида – 8000 метрдан баландда жойлашган, кислород даражаси критик даражада пастлиги сабабли инсон организми тез фурсатда ҳолдан тоя бошлайдиган “ўлим ҳудуди” деб аталувчи жойда кўришган.

Қариндошлари унинг қутқарилишидан умидини узган. Бироқ орадан деярли бир ҳафта ўтиб, эркак тирик ҳолда топилган. Қутқарувчиларнинг сўзларига кўра, у базавий лагерь томон мустақил равишда пастга қараб эмаклаб тушаётган бўлган.

Маълум бўлишича, шерпа шунча вақт давомида кичкина пакетдаги печенье ва эритилган муз эвазига тирик қолган. У топилганидан сўнг, вертолётда Катмандудаги шифохонага эвакуация қилинган. Шифокорларнинг хабар беришича, эркакнинг ҳуши ўзида ва у совуқ уриши, сувсизланиш ҳамда баландликда ҳаддан ташқари узоқ қолишнинг бошқа оқибатлари бўйича даволанмоқда.

Эслатиб ўтамиз, аввалроқ Непал ҳудуди орқали бир куннинг ўзида рекорд даражадаги 274 нафар альпинист Эверест чўққисини забт этиб, рекорд ўрнатгани ҳақида хабар берилган эди.