Навальная Европарламентда чиқиш қилди

Кеча, 28 февраль куни Юлия Навальная Страцбургда Европарламент аъзолари олдида чиқиш қилди ва уларга Россия Президенти Владимир Путиннинг асосий душманининг беваси бўлиш қандай бўлганини айтиб берди. 

Унинг нутқидаги сиёсий чақириқ битта эди: Европа Иттифоқида Владимир Путин бошчилигидаги "уюшган жиноий тўда" билан дипломатия ва хавотир изҳорлари ёрдамида эмас, балки молиявий фирибгарлик ва "мафия" шерикларини қидириш ва яширин пулларни излаш орқали курашиш керак. 

Юлия Навальная бир ҳафта олдин Брюсселда Европа Иттифоқи раҳбарлари билан учрашганда Россияда бўлажак президентлик сайловлари натижаларини тан олмасликка чақирганди. Бироқ бу сафар бу мавзу четда қолди. Аммо у Украинадаги урушни қоралади.

Бироқ, баъзилар учун бу етарли эмас эди. Мисол учун, германиялик Виола фон Крамон-Таубаделнинг фикрича, Юлия Навальная Россиянинг Украинадаги тажовузкорлигини қоралашдан ташқари, ўз давридаги Светлана Тихановская каби бу урушда Россия мағлуб бўлиши кераклигини айтиши керак эди.

Литвадан Россия бўйича махсус маърузачи Андриус Кубилиус немис ҳамкасбининг фикрига қўшилмади. 

“Ғарб сиёсатчилари бу ҳақда Европа парламентида ҳам кўпроқ гапириши керак. Агар биз Россия ўзгаришини истасак, ўзимиз ҳам, Юлия Навальная ёки бошқа биров бизга нима қилиш кераклигини айтмагунча кутмасдан,  олигархларни таъқиб қилиш ва Украинага ёрдам бериш стратегиясини амалга оширишимиз керак”, дейди Кубилиус.

Шу билан бирга, унинг сўзларига кўра, гарчи бундай тингловларда бунинг аксини эълон қилишса-да, европалик депутатлар орасида Россиянинг демократик келажагига аслида ишонмайдиганлар ҳам бор.

"Бугун энг муҳими қўрқмасликдир. Навальний қўрқмаганидек, украиналиклар ҳам қўрқмаганидек, Путинни тўлиқ мағлуб этишдан ва Украинага ғалаба қозонишда ёрдам беришдан қўрқманглар", дея ҳамкасбларига мурожаат қилди Литванинг яна бир вакили Раса Жукневичиене мунозара давомида. 

Андриус Кубилиуснинг фикрича, Россиядаги режимни енгишнинг ягона йўли Украинанинг Ғарб кўмагида ҳарбий ғалабаси, шунингдек, Украинанинг кейинчалик Европа Иттифоқи ва НАТОга интеграциялашувидир. 

"Бу Россия Федерацияси фуқаролари учун, агар мамлакат демократик тамойилларга риоя қилса, бундай муваффақиятга эришиш мумкинлиги ҳақида илҳомлантирувчи мисол бўлиши мумкин", деб ҳисоблайди депутат.

Аксарият парламентарийлар Юлия Навальнаяга унинг дардини баҳам кўрганликларини ва унга жасорати, чидамлилиги ва эрининг ишини давом эттириш қарори учун миннатдорлик билдирди. Европа халқ партияси гуруҳи раҳбари Манфред Вебер унга: 

“Сиз эркин ва демократик Россия умидини сақлайсиз. Европаликлар ва демократлар сифатида биз бу умидни сиз билан бирга олиб юришимиз мумкин”, деган. 

Самимий таъзиядан сўнг Навальнийнинг бевасининг мурожаатидан аниқ таъсирланган парламент аъзолари Россия мухолифати етакчисининг ўлими ҳолатлари юзасидан мустақил халқаро тергов ўтказишга чақиришди. 

Европарламент Россиядаги юзлаб сиёсий маҳбуслар, жумладан Владимир Кара-Мурза ва Илья Яшин тақдиридан хавотирда. 

“Эрингиз хотирасига биз нафақат мустақил терговга эришиш, балки Россияда қолган сиёсий маҳбуслар ва бу шафқатсиз режимдан жабр кўраётганларни ҳимоя қилиш учун қўлимиздан келганини қилишимиз керак”,  дейди Германиядан “яшиллар” гуруҳи ҳамраиси Терри Рейнтке.

Европа комиссари Кадри Симсоннинг сўзларига кўра, Россия нодавлат ташкилотлари сиёсий маҳбусларни, жумладан, урушга қарши намойишлар иштирокчиларини ҳуқуқий ҳимоя қилиш учун Брюсселдан ёрдам олади. Симсоннинг айтишича, Европа Иттифоқи мустақил рус тилидаги оммавий ахборот воситалари ва журналистларни ҳам қўллаб-қувватлайди. 

“Биз Россияга инсон ҳуқуқлари бузилиши юзасидан халқаро босим ўтказишда давом этамиз ва шахсларни, шу жумладан суд жараёнларини кузатиш орқали қўллаб-қувватлаймиз”, деб ваъда берди Европа комиссари.

Европарламент бугун, 29 февраль куни “Алексей Навальнийнинг ўлдирилиши ва Россияда сиёсий маҳбуслар ва бостирилган фуқаролик жамиятини қўллаб-қувватлаш бўйича Европа Иттифоқининг чоралар кўриш зарурлиги” резолюциясига овоз беради.