НАТОга қўшилган Финляндия Исроилдан қурол сотиб олади

Финляндия НАТОга қўшилганидан бир кун ўтиб, ракетага қарши тизимни сотиб олиш учун буюртма берди. Бу ҳақда мамлакат Мудофаа вазирлиги хабар берди. 

Қайд этилишича, Финляндия кеча, 5 апрель куни Исроилга David's Sling ракетага қарши мудофаа тизимини сотиб олиш учун буюртма берган. Шу тариқа мамлакат ушбу тизимни сотиб оладиган биринчи хорижий давлатга айланди. Шартнома қиймати 316 миллион евро (344 миллион доллар)ни ташкил қилади. 

"David's Sling тизими Финляндиянинг қуруқликдаги ҳаво мудофааси имкониятларини сезиларли даражада кенгайтиради", дейилади Мудофаа вазирлиги берган баёнотда. 

Маълумот учун, ушбу мудофаа тизими Rafael Advanced Defense Systems томонидан ишлаб чиқарилади. Тизим 40-300 километр радиусдаги ракеталарни уриб тушириши мумкин. "Сеҳрли таёқча" номи билан ҳам танилган мудофаа тизими 2017 йилдан буён Исроилда фойдаланиб келинади. У мамлакатнинг кўп қатламли ҳаво ҳужумидан мудофаа тизимининг ўрта бўғинини ташкил қилади. David's Sling қисқа масофали Iron Dome ҳамда юқори даражали Arrow-2 ҳамда Arrow-3 тизимлари билан бириктирилган ҳолда Исроилни ҳаво ҳужумидан ҳимоя қилади. 

Эслатиб ўтамиз, Финляндия жорий йилнинг 4 апрель куни НАТО ҳарбий блокининг 31-аъзосига айланганди. АҚШ Президенти Жо Байден эса мамлакатни бу билан қутлаган.

Нодиржон Мадаминов